ئامېرىكا تىبەتلەرنى ئۆزىنىڭ پىكرىنى ئۆزىنى كۆيدۈرۈشتىن باشقا يوللار ئارقىلىق ئىپادىلەشكە چاقىردى

ئامېرىكا تاشقى ئىشلار مىنىستىرلىقى باياناتچىسى ۋېكتورىيە نۇلاند مۇخبىرلارغا مۇنداق دېدى: بىز ئۆزىنى كۆيدۈرۈش ۋەقەلىرىنىڭ داۋاملىق يۈز بېرىشىدىن چوڭقۇر قايغۇرۇۋاتىمىز. بىز ئۆزىنى كۆيدۈرۈشنى ئويلىشىۋاتقان تىبەتلەرنىڭ ئۆز پىكرىنى باشقا ياخشىراق يوللار ئارقىلىق ئىپادىلىشىگە چاقىرىمىز. شۇنىڭ بىلەن بىرگە بىز يەنە، دائىم تەكىتلەپ كەلگەندەك خىتاي ھۆكۈمىتىنى بۇ خىل نارازىلىقنى كەلتۈرۈپ چىقارغان تىبەت سىياسىتىنى كۆزدىن كەچۈرۈشكە چاقىرىمىز.

بۇ ئامېرىكا دۆلەت ئىشلار مىنىستىرلىقىنىڭ يېقىنقى بىر ھەپتە ئىچىدە 2‏-قېتىم تىبەت مەسىلىسىنى تىلغا ئېلىشىدۇر.

ۋېكتورىيە نۇلاند مەزكۇر باياناتنى ئېلان قىلىشتىن ئىككى كۈن ئاۋۋال، نېپالدا ياشايدىغان بىر تىبەت مۇھاجىر ئۆزىنى كۆيدۈرگەن. 21 ياشلار چامىسىدىكى بۇ تىبەتلىك ئۆلگەن بولۇپ، ئۇ 2009‏-يىلدىن بۇيان ئۆزىنى كۆيدۈرۈپ خىتايغا نارازىلىق بىلدۈرگەن تىبەتلەردىن 101‏-كىشى.

خىتاي ھۆكۈمىتى تىبەتلەرنىڭ ئۆزىنى كۆيدۈرۈش ھەرىكەتلىرىگە بىر تەرەپتىن پەرۋا قىلمىغاندەك كۆرۈنۈپ، يەنە بىر تەرەپتىن قاتتىق باستۇرسىمۇ، لېكىن خەلقئارا جەمئىيەتنىڭ دالاي لاما بىلەن سۆھبەت ئۆتكۈزۈپ، تىبەت مەسىلىسىنى ھەل قىلىش ھەققىدىكى كۈچلۈك بېسىمىغا دۇچ كەلمەكتە.

ۋېكتورىيە نۇلاند ئۆتكەن ھەپتە بىر قېتىم خىتاي ھۆكۈمىتىنى دالاي لاما بىلەن سۆزلىشىشكە چاقىرغان.