ئوخشاش بىر ۋاقىتتا پاكىستان تاشقى ئىشلار مىنىستىرىمۇ بايانات ئېلان قىلىپ، خىتاي ھۆكۈمىتىنىڭ «شەرقىي تۈركىستان تېررورچىلىرىغا زەربە بېرىش ھەرىكىتىنى قوللايدىغانلىقى» نى بىلدۈرگەن.
قەشقەردە ۋەقە چىققاندىن كېيىن، پاكىستان ھۆكۈمىتى پاكىستاندىكى ئەڭ كۈچلۈك جاسۇسلۇق ئورگىنى-پاكىستان مۇشتەرەك ئىستىخبارات مۇدىرىيىتىنىڭ دىرېكتورى لېيتېنانت گېنېرال ئەھمەد شۇجاھ پاشانى دەرھال بېيجىڭغا ئەۋەتكەن. بۇ پاكىستاننىڭ ئۇيغۇر قارشىلىق ھەرىكەتلىرىنى باستۇرۇشتا خىتايغا يېقىندىن ياردەمدە بولىدىغانلىقىنى كۆرسىتىدىكەن.
پاكىستان-خىتاي ئىنستىتۇتنىڭ مۇدىرى مۇشاھىد ھۈسەيىن سەيېد رويتېرس ئاگېنتلىقىنىڭ زىيارىتىنى قوبۇل قىلغىنىدا: بىز پاكىستان تېررىتورىيىسىنىڭ باشقىلارغا بولۇپمۇ، يېقىن قوشنىمىز خىتايغا قارشى ھەرىكەت ئۈچۈن ئىشلىتىلىشىگە يول قويمايمىز، دېگەن.
رويتېرس ئاگېنتلىقىنىڭ خەۋىرىدە خىتاي-پاكىستان مۇناسىۋىتى ھەققىدە مۇلاھىزە يۈرگۈزۈلۈپ، يېقىندىن بۇيان، پاكىستاننىڭ دىپلوماتىك مۇناسىۋەتتە ئامېرىكىدىن يىراقلىشىۋاتقانلىقى، ئەكسىچە خىتاي بىلەن پاكىستان مۇناسىۋىتىدە زىيادە يېقىنلىشىش كەيپىياتى كۈچەيگەنلىكى، بولۇپمۇ خىتاي ھۆكۈمىتى ئۇيغۇرلارغا قاراتقان باستۇرۇش ھەرىكەتلىرىدە پاكىستاننىڭ ھەر ۋاقىت خىتايغا يانتاياق بولۇپ كېلىۋاتقانلىقى ئىلگىرى سۈرۈلگەن.