Хитай, уйғурларға 'мукапатлаш арқилиқ аз туғушқа көндүрүш' усулини қолланмақта

Уйғур аптоном районлуқ пиланлиқ туғут комитетиниң муавин башлиқи яң мавлинниң хитай ахбаратлириға ейтқан сөзлиридин ашкарилинишичә, хитай даирилири 2008 - йилидин башлап пиланлиқ туғут хизмитиниң нишанини асаслиқ уйғур елиниң җәнубидики үч вилайәт, бир областқа қаратқан болуп, бу районлардики деһқан, чарвичиларни сиясәт буйичә үч пәрзәнтлик болуш һоқуқидин ваз кечип, икки яки бирла пәрзәнтлик болушқа көндүрүш үчүн пиланлиқ туғут мукапат мәблиғи аҗратқан вә мәхсус етибар бериш сиясәтлирини қоллинип кәлмәктә икән.
Мухбиримиз гүлчеһрә
2009-02-03
Share

Пиланлиқ туғут даирилири уйғурлар зич олтурақлашқан үч вилайәт, бир областта хитайниң аз санлиқ милләт деһқан, чарвичилириға қаратқан пиланлиқ туғут сияситидә бәлгиләнгән әсли үч пәрзәнтлик болушқа һоқуқлуқ деһқан, чарвичилар аилиси һәр бир пәрзәнтни аз көрүшкә қошулса, үч миң йүәндин мукапатлап, уларни аз туғушқа риғбәтләндүрүп бу райондики нопусниң ешишини җиддий контрол қилмақта икән.

Хитай даирилири уйғур елидә нопусниң тәбиий ешиш нисбитини йәнила пиландин юқири дәп көрситип кәлмәктә. Буниңда болупму, уйғурлар нопусниң %85 тин юқирисини игиләйдиған үч вилайәт, бир областни бәкрәк тилға еливатқан болуп, ваң лечүән өткән йилидики пиланлиқ туғут хизмәт йиғинида, даириләрниң уйғур елиниң җәнубидики нопус контроллуқини күчәйтишини тәләп қилған иди.

Радиомизға инкас қилған уйғурлар хитай һөкүмитиниң уйғурларға қарита нопус контроллуқини рәһимсиз рәвиштә мәҗбурий елип бериватқанлиқини шикайәт қилған болса,чәтәлләрдики уйғур тәшкилатлири хитай һөкүмитиниң уйғурларға қарита қаттиқ қоллуқ билән йүргүзүватқан пиланлиқ туғут сияситиниң ирқий қирғинчилиққа ятидиғанлиқини билдүрмәктә.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт