“Qeshqer yéngi bazar weqesi” de ziyan'gha uchrighan xitaylargha yardem puli bérilidighanliqi uqturuldi

Qeshqer wilayetlik hökümet bu heqte tarqatqan uqturushtin melum bolushiche, hökümet da'iriliri“Weqede yarilan'ghanlarni dawalash xizmetlirige jiddiy qarap, uni intayin etrapliq orunlashturghan” ning sirtida, weqede ölgenlerning a'ile-tawabi'atliri we yarilan'ghanlarning her birige 200 ming yüendin qutquzush puli béridighanliqini élan qilghan.

Ikki yilning aldida “Ürümchi weqesi” yüz bergendimu xitay da'iriliri weqede ziyan'gha uchrighan xitaylargha yüz ming yüenlep qutquzush yardem puli bergen. Emma, shu oxshash künde hem-7 iyul qoligha tömür toqmaqlarni élip kochilargha chiqqan xitaylarning Uyghurlardin qisas élish herikitide yarilan'ghan yaki ölgen Uyghurlargha héchqandaq tölem bérilmigen, hetta u Uyghurlardin héchqandaq bir hökümet rehbiri ehwal sorimighan idi.

Eyni chaghda xitay hökümitining mana bu perqliq mu'amilisimu Uyghurlar arisida naraziliq peyda qilghan.

Chet'ellerdiki Uyghur pa'aliyetchiliri xitay hökümitining Uyghurlarni öz puqrasi qatarida körmeydighanliqining mana shu tölem tölesh mesilisidimu éniq otturigha chiqiwatqanliqini, xitay hökümitining Uyghurlargha perqliq siyaset yürgüzüwatqanliqini bildürüshmekte.