'Muhebbetning 10 sherti' filimining teywende aldin qoyulmaqchi bolghanliqi xitayni xapa qildi

Teywende qozghalghan bu bir qatar ghulghulilar netijiside gawshyung sheherlik hökümiti bu filimni aldin'ala 22 - séntebir küni qoyidighanliqini élan qildi. Teywen merkiziy agéntliqining bu heqtiki xewiridin melum bolushiche, gawshiyungning mezkur qarari xitay dölet ishliri kabinétigha tewe teywen ishliri idarisining naraziliqini qozghidi.

Teywen ishliri idarisining bayanatchisi gawshiyungning bu qararigha qarshi chiqip, béyjingning nechche waqittin buyan dawamlashturup kéliwatqan rabiye qadirgha qaratqan eyibleshlirini tekrarlidi shuningdek gawshyung da'irilirini bu arqiliq ikki qirghaq munasiwetliride yene ish chiqarmasliqqa dewet qildi.

Bu heqte birleshme agéntliqimu xewer tarqatqan bolup, teywen ishliri idarisining bayanatchisi xitayning bu filimning qoyulushigha qet'iy qarshi turidighanliqini jakarlighan.

Yaponiye ziyaritidin qaytqan gawshyung sheher bashliqi bu mesile heqqide toxtilip, gawshyung kino féstiwalining musteqil bir féstiwal ikenliki, sheher hökümitining her qaysi orunlarning filim qatnashturushi we musteqil pa'aliyet qilishini hörmet qilidighanliqini, shunga esli pilan boyiche rabiye qadir heqqidiki filimning gawshyung filim féstiwalining tertipige yenila kirgüzilidighanliqini tekitligen.