Русийиниң новосибирск шәһиридә фашистларға қарши намайиш өткүзүлди

Йәкшәнбә күни русийиниң новосибирск шәһиридә рус иҗтимаий паалийәтчилири вә демократлири тәрипидин фашистларға қарши намайиш өткүзүлгән болуп, бу намайишниң түп нишани йеқинда барнаул шәһиридә бир корийилик оқуғучиниң тақирбашлар дәп аталған фашист тәшкилатиниң адәмлири тәрипидин өлтүрүветилишигә наразилиқ билдүрүш болуп һесаблиниду.
Мухбиримиз үмидвар
2010.02.28
Share on WhatsApp
Share on WhatsApp

Русийиниң "нәвсру" ториниң хәвәр қилишичә, намайишчилар йеқиндин буян русийидә башқа милләтләрни чәткә қақидиған ирқчилиқ, җүмлидин фашизмлиқ қилмишларниң күчийип кетиватқанлиқини көрситип, кишиләрни фашизмлиқ хаһишларға бирликтә қарши турушқа чақирған.

Намайишчилар қоллирида " фашизмға бирликтә қарши турайли", "фашизм әмәлгә ашмайду" дегәндәк лозункиларни көтүргән.
 
Русийә мәтбуатлири, тақирбашлар дәп аталған рус фашист яшлар гуруһиниң адәм саниниң 50 миңдин ешип кәткәнликини, уларниң москвадин тартип, йирақ шәрқтики владивостокқичә болған кәң даиригә йейилип, қара тәнликләр, кавказлиқлар, оттура асиялиқлар вә хитайларни өз ичигә алған шәрқий асиялиқларни асаслиқ һуҗум нишани қилғанлиқини йезишмақта.

26 - Феврал күни москвада "ақ борә" дәп аталған бир тақирбашлар гуруһиниң әзалири сотлинип қамаққа һөкүм қилинған болуп, улар нәччә онлиған қирғиз, өзбек вә таҗик вә һәм башқа милләт кишилиригә һуҗум қилған вә өлтүргән икән.

Мәзкур фашистлар гуруһиниң асаслиқ шуари "русийә пәқәт руслар үчүнла" дегәндин ибарәт. Фашистларға қарши намайиш илгири москва шәһиридиму бир қанчә қетим йүз бәргән иди.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт