Süriyide hökümet istépa berdi

Süriyide ikki heptidin béri dawam qiliwatqan hökümetke qarshi namayishning netijiside, bügün hökümet istépa berdi. Süriye dölet bashliqi beshar esad, hökümetning istépasini qobul qildi.
Muxbirimiz shöhret hoshur
2011.03.29

U 2003-yildin bashlap bash ministir bolup wezipe ötewatqan naji itrini bash ministirliq wezipisidin istépa bergendin kéyin, waqitliq bash ministir qilip teyinlidi؛ naji itri yéngi hökümet qurulghan'gha qeder wezipisini dawamlashturmaqchi. Xewerlerde, bügün beshar esadning bir téléwiziye nutqi sözlep özining islahat pilanlirini ashkarilaydighanliqi bayan qilinmaqta.

Beshar esad misirda namayish yüz bériwatqan chaghdila weqedin sawaq élip süriyining pat yéqinda islahat élip baridighanliqini élan qilghan we süriyide 48 yildin béri dawam qilip kéliwatqan herbiy haletni bikar qilghanliqini élan qilghan idi. Emma, besharning bu ijabiy pozitsiyisidin süriyidiki öktichi guruppilar qana'et hasil qilmidi. Netijide ikki heptining aldida jenubtiki dera shehiride namayish bashlandi.

Namayish ötken hepte bashqa sheherlergimu kéngeydi.

 Melum bolushiche, namayish bashlan'ghandin buyanqi hökümetke qarshi we hökümet terepdari guruppilar arisida chiqqan toqunushlarda 130din artuq kishi ölgen.

Közetküchiler beshar esadning misir we liwiye weziyitidin sawaq élip, öktichilerning teleplirige téz we ijabiy jawab qayturush éhtimalliqini texmin qilishmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.