Teywen xitaygha qarshi manéwir ötküzüp yéngi qorallirini sinaq qildi

Fransiye axbarat agéntliqining bu heqtiki xewiride bildürüshiche, manéwirda, su asti paraxotlirigha zerbe béridighan ilghar tiptiki tik'ucharlar we hujumchi ayropilanlar sinaq qilin'ghan. Teywen dölet mudapi'e ministirliqi bügün mezkur manéwir heqqide muxbirlargha melumat bergende, manéwirda sinaq qilin'ghan yéngi qorallarning tip we türliri heqqide konkrét toxtalmighan.

Teybéyde chiqidighan erkinlik gézitide xewer qilinishiche, teywen bu qétim amérikidin kéler yili sétiwélinidighan qorallarni teqlidi sinaq qilghan. Xewerde bayan qilinishiche, teywen kéler yili amérikidin 6 daneApache AH-64D tipliq tik'uchar we 6 dane P-3C tipliq su asti paraxotlirigha zerbe béridighan hujumchi ayropilanlarni sétiwalmaqchi. Amérikining teywen'ge mezkur qorallirini sétip bérish pilani 2007-yili otturigha chüshken, 2008-yili washin'gton teywen'ge 6 milyard 500 milyon dollarliq qoral sétip bérishni qarar qilghan. Shuningdin étibaren xitay bilen amérika otturisida teywen'ge qoral sétip bérish mesilisi üzlüksiz talash-tartish qilinip kelmekte.