Тибәт сәргәрдан һөкүмити баш министири тибәтләрни чағанни тәбриклимәсликкә чақирди

Тибәт тәшкилатлириниң билдүрүшичә, 2009-йилдин бери җәмий 99 нәпәр тибәт өзини көйдүрүп, хитайниң тибәт сияситигә наразилиқ билдүргән. Лобсаң сангай мундақ дегән: бу трагедийилик вәзийәтни көздә тутуп, тибәтләрдин лосар байримида нормал тәбрикләш паалийәтлирини өткүзмәсликни тәләп қилимән.

У, тибәтләрни байрамда миллий кийим-кечәклирини кийип, өзиниң кимлики вә өрп адәтлирини намаян қилишқа, ибадәтханиларни зиярәт қилип, хәйри-сахавәт ишлири билән шуғуллинишқа чақирған.

Лобсаң сангай мәзкур чақириқни елан қилиштин сәл бурун гәнсуниң тибәт аптоном областидики бир ибадәтхана алдида кончак кяб исимлик 26 яшлардики бир тибәт чарвичи өзини көйдүрүп наразилиқ билдүргән иди. Франсийә ахбарат агентлиқиниң хәвәр қилишичә, көйүп еғир яриланған бу яш өлгән.

Мутләқ көпчилик тибәтләр хитай һөкүмитини тәнқидләп, униң диний бастуруш, тибәт мәдәнийитини йоқитиш, хитай көчмәнлирини тибәткә көчүрүш сиясити йүргүзүватқанлиқини билдүрсиму, бирақ хитай һөкүмити бу җәһәттики тәнқидләрни рәт қилип, тибәтләрниң диний әркинликтин бәһримән болуп келиватқанлиқини, тибәтниң заманивилишиш вә иқтисади тәрәққиятиға көпләп мәбләғ селиватқанлиқини илгири сүрүп кәлди.