Хитай һәрбиликтин чекингән бир тебәтликни тибәт аптоном райониниң рәислик орниға қойди

Хитай даирилири хәлқ азадлиқ армийисигә қатнишип һәрбиликтин чекингән бирсини тибәт аптоном райониниң рәислик орниға қойди. Анализчилар бу хитайниң тибәт сияситиниң радикаллишидиғанлиқидин дирәк беридиғанлиқини билдүрмәктә.
Мухбиримиз әркин
2010-01-15
Share

Хитай азадлиқ армийисиниң һәрбиликтин чекингән сабиқ офитсири падма чолиң җүмә күни қәсәм берип, тибәт аптоном райониниң рәислик вәзиписини тапшурувалған.

Падма чолиңдин бурун тибәтниң рәислик вәзиписини атқурған чяңба понсог болса тибәт аптоном райони хәлқ қурултийиниң мудирилик вәзиписигә қоюлди. Тибәт хәлқ қурултийиниң бурунқи мудири легчог болса вәзиписидин истипа беришкә мәҗбур болған иди.

Бу 2008 ‏- йили 3 - айда лхаса вәқәси партилиғандин буян тибәт аптоном райониниң рәһбәрлик қатлимида йүз бәргән әң чоң өзгириш болуп, бу өзгириш хитай даирилирини тибәттики сиясий контроллуқни бошутуш, далай лама билән һәқиқий мәнидә сөһбәт елип беришқа чақириватқан бәзи чәтәл һөкүмәтлирини вә хәлқара кишилик һоқуқ тәшкилатлирини өмидсизләндүргән.

Хәлқара тибәт һәрикити тәшкилатиниң алақә ишлар мудири кейт сандерс ханим, тибәттики "бу йеңи вәзипә тәқсимати бейҗиңниң тибәт районида маһийәтлик тәкшүрүш елип барғандин кейин қарар қилинғанлиқини испатлайдиған һичқандақ пакит йоқлуқи"ни билдүргән.

Йәнә бәзи көзәткүчиләр, падма чолиң йеқинқи 30 йилдин буян тибәт аптоном райониниң рәислик вәзиписигә қоюлған тунҗи һәрбий икәнликини, униң "14‏ - март лхаса вәқәси"дин кейин хитай мәтбуатлирида дала ламани тәнқидләйдиған баянатлириниң елан қилинғанлиқини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт