Jazalan'ghan tor bashqurghuchilirining sani heqqide perqliq uchurlar kelmekte

Xitayning 5" - iyul " din kéyinki jazalash heriketliride Uyghur tor bashqurghuchiliri asasliq hujum nishanliridin biri bolghan. Bu ehwal, intérnétning 10 ay késiwétilishi we yéqinda gheyret niyaz we dilshat perhat qatarliq 4 neper tor bashqurghuchisining sotlinishi qatarliq weqelerdin melum bolup turghan bolsimu, neq jazalan'ghan tor bashqurghuchilarning sani yenila sir halette turmaqta idi.

Muxbirimiz shöhret hoshur
2010-07-30

Yéqinda Uyghur élidin chet'elge chiqqan we " 5 - iyul" weqesige chétilip 2 ay qamaqta yatqan bir Uyghur yash, bügün radi'omizgha téléfon qilip, qamaqta körgen - anglighanliri heqqide melumat berdi. Uning bildürüshiche, u qamaqtiki chéghida selkin torining bir bashqurghuchisi bilen bir kamirda yatqan, mezkur bashqurghuchi selkin torining 100din artuq bashqurghuchisi barliqi we buning mutleq köp qismining tutqun qilin'ghanliqini dep bergen. Mezkur bashqurghuchi yene özining tor bette shawgu'en weqesi heqqide yézilghan "qérindashlirimgha xet" namliq maqalining élan qilinishigha yol qoyghanliqi üchün tutulghanliqini bildürgen.

Intérnét échiwétilgendin kéyinmu, Uyghur tor betlirining mutleq köp qismining ta hazirghiche eslige kelmesliki, sabiq mehbusning selkin torining bashqurghuchilirining tutulush ehwali heqqidiki sanliq melumatlarning toghriliqidin bisharet bermekte.