Xitay torgha hujum qilish weqeliride qoli barliqini ret qildi

Amérika McAfee tor bixeterlik shirkiti doklat élan qilip, yéqinqi besh yildin buyan yüz bergen keng kölemlik tor hujumlirining peqet bir nuqtidin élip bérilghanliqini élan qilghan. Doklatta tor hujumi élip barghan döletning ismi tilgha élinmighan bolsimu, biraq analizchilar birdek buning xitay ikenlikini ilgiri sürgen idi.

Xitay kompartiyisining “Xelq” géziti jüme küni doklatni tenqidlep, “Tor buzarlarni xitay bilen alaqidar qilip körsitish mes'uliyetsizlik” dégen we buning “Put tirep turalmaydighanliqini” ni ilgiri sürgen.

McAfee Doklatta, tor buzarlarning hujumigha uchrighan organ we shirketler ichide amérika hökümet organliri, b d t, xelq'ara olimpik komitéti we amérika dölet mudapi'e ministirliqi ish béridighan höddiger shirketlerning barliqini bildürgen.

Bu xitayning “Xelq” géziti arqiliq amérika tor bixeterlik doklatigha qayturghan tunji inkasi. Biraq, bu xitayning tunji qétim tor buzarliq qilish bilen eyiblinishi emes. Bu yil 6‏-ayda Google shirkiti xitay tor buzarlirining amérika hökümet emeldarliri, herbiy xadimliri, muxbirlar we xitay siyasiy öktichilirining Gmail xet sanduqigha hujum qilghanliqini ilgiri sürgen.