Турпандики уйғур тиҗарәтчиләр асаслиқ орунни игиләйдиған бир сода базириға от кетип, нурғун зиян келип чиққан
2012.12.07
От апити бу йил 9-айниң ахирлирида йүз бәргән болсиму, бирақ йәрлик һөкүмәт һазирғичә апәткә учриған тиҗарәтчиләрни қандақ орунлаштуруш, уларниң төләм вә башқа җәһәттики ярдәм ишлирини қандақ бир тәрәп қилиш һәққидә һечқандақ тәдбир алмиған.
Вәқәдин хәвәрдар йәрлик пуқраларниң илгири сүрүшичә, пүткүл базар от апитидә тамамән көйүп күлгә айланған. От өчүрүш хадимлири нәқ мәйданға кечикип кәлгән.
Гәрчә йәрлик от өчүрүш орунлири вәқә йүз берип бир қанчә күндин кейин, от апити һәққидә доклат елан қилған болсиму, бирақ отниң немә сәвәбтин келип чиққанлиқини чүшәндүрмигән. Доклатта пәқәт көзәтчиләр бихәстәлик қилиш билән тәнқид қилинған. Агаһландуруш сигналиниң яхши ишлимәйдиғанлиқи, мудапиә әслиһәлириниң яхши әмәслики илгири сүрүлгән.
Йәрлик пуқраларниң илгири сүрүшичә, һөкүмәтниң от апитиниң келип чиқиш сәвәбини чүшәндүрүштин өзини қачуруши, хәлқ арисида түрлүк гуманларни пәйда қилған.
Безиләр отниң қәстән қоюлғанлиқини илгири сүрүп, апәтни уйғурларни қоғлап чиқирип, базарни тәнһа игиләш мәқситидики кишиләр пәйда қилған болуши мумкинликини билдүргән.
Бу мәзкур базарға 2-қетим от кетишидур. Буниңдин 4 йил аввал мәзкур базарға бир қетим от кетип, нурғун зиян келип чиққан иди.