19 Yashliq uniwérsitét oqughuchisi pezilet ekberge kéchiktürme ölüm jazasi bérilgen

Bügün xitay ölkiliridiki radi'o anglighuchilirimizdin birining inkas qilishiche, shinjang uniwérsitéti rus tili sinipining oqughuchisi pezilet ekberni, ürümchi sheherlik ottura sot mehkimisi bu yil 4 ‏-ayda ölüm jazasigha höküm qilip, jazani 2 yil kéchiktürüp ijra qilishqa buyrughan.
Muxbirimiz shöhret hoshur
2010-12-28
Élxet
Pikir
Share
Print

Inkasta bildürülüshiche pezilet ekber, 5 ‏-iyul weqesidin 2 ay kéyin tutqun qilin'ghan we 4 ‏-ayning axirlirida échilghan bir qétimliq mexpiy sotta, qatilliq jinayiti bilen eyiblen'gen. Melum bolushiche, pezilet ekber eslide qorghas nahiyisining süydüng baziridin bolup, u shinjang uniwérsitétining rus tili sinipini 3 yil oqughandin kéyin, a'ile qiyinchiliqi sewebi bilen oqushini waqitliq toxtitip qoyushqa mejbur bolghan we döngköwrüktiki xelq'araliq chong bazarda bir xitay tijaretchining dukinida terjiman hem mal satquchi bolup ishligen.

U 5 ‏-iyul küni dostliri bilen birlikte namayishqa qatnashqan. Inkasta bildürülüshiche, pezilet ekberning dadisi u sotlinishtin 2 kün burun, uni yoqlap ürümchige kelgende, ürümchi shehirining ghalibiyet yoli saqchiliri peziletning dadisini pezilet bilen körüshtürmigen we ürümchidin kétishke buyrughan. Peziletning ata-anisi uning sotlan'ghanliq xewirini sottin kéyin uqqan.

Radi'omizgha yollan'ghan inkasta, pezilet ekberning sot küni konkrét qandaq heriketliri seweblik eyiblen'genliki heqqide melumat bérilmigen. Pezilet ekberning sawaqdashliridin birining muxbirimizgha bayan qilishiche, pezilet ekberning bowisi, 1944 ‏-yilidiki ili, tarbaghatay we altayda partlighan sherqiy türkistan milliy azadliq inqilabigha qatnashqan ghazilardin biridur.

Muxbirimizning alaqidar uchur qanalliri arqiliq igilishiche, pezilet ekber nöwette ürümchidiki ayallar türmiside jaza mudditini ötimekte. Emma pezilet ekberning ata-anisining uni hazirgha qeder türmige bérip yoqlash pursitige érisheligen yaki érishelmigenliki melum emes.

Toluq bet