5‏-ئىيۇلغا ۋەقەسىگە مۇناسىۋەتلىك دېلولارغا مەسئۇل تۇرسۇن بەختىنىڭ تۇيۇقسىز ئۆلۈمى گۇمان قوزغىدى

گەرچە ھېچقانداق پاكىت بولمىسىمۇ، لېكىن ئۇنىڭ ئۆلۈمىدىن گۇمان قىلغۇچىلار تۇرسۇن بەختىنىڭ «5-ئىيۇل ۋەقەسى» دە ئىز-دېرەكسىز يوقاپ كەتكەن ئۇيغۇرلارنى سۈرۈشتۈرۈپ، خىتاي ئامانلىق ئورگانلىرىنىڭ غەزىپىنى قوزغاپ قويغان بولۇشى ئېھتىمالغا يېقىن، دەپ قارايدىكەن.

ئۈرۈمچى شەھەرلىك ساقچى ئىدارىسىدىكى خادىملارنىڭ ئاشكارىلىشىچە، ئۇ تاماكا‏، ھاراق ئىچمىسىمۇ ۋە ھېچقانداق كېسىلى بولمىسىمۇ، بىراق بۇنىڭدىن 3 ھەپتە ئىلگىرى ئۆزى ئولتۇرۇشلۇق ئائىلىلىكلەر قورۇسىدىكى پەلەمپەيدىن چىقىۋېتىپ شۇ جايدا يىقىلىپ جان ئۈزگەن.

بۇ خىتاي ئامانلىق ئورگانلىرىغا ئىشلەيدىغان ئۇيغۇر كادىرلاردىن تۇيۇقسىز ئۆلۈپ قېلىپ، ئۇيغۇر جەمئىيىتىدە ئۆلۈش سەۋەبى «5-ئىيۇل ۋەقەسى» گە مۇناسىۋەتلىك، دەپ گۇمان قوزغىغان 2‏-كىشى. ئۆتكەن يىلى ئاپتونوم رايونلۇق دۆلەت بىخەتەرلىك نازارىتىنىڭ غەيرەت ئىسىملىك بىر كادىرىمۇ تۇيۇقسىز ئۆلۈپ كېتىپ، ئۇيغۇر جەمئىيىتىدە ھەر خىل گۇمانلارنى قوزغىغان. غەيرەتنىڭ 5‏-ئىيۇلدا خىتاي ئامانلىق كۈچلىرىنىڭ ئۇيغۇر تۇتقۇنلىرىغا قىلغان بەزى جىنايەتلىرىنى ئاشكارىلاپ قويغانلىقتىن زەھەرلەپ ئۆلتۈرۈلگەنلىكى ئىلگىرى سۈرۈلگەن ئىدى.

تۇرسۇن بەختىنىڭ ئۆلۈپ كەتكىنىگە 3 ھەپتىدىن ئېشىپ قالغان بولسىمۇ، بىراق دائىرىلەر ۋە ئائىلىسى ئۇنىڭ نېمە سەۋەبتىن ئۆلۈپ قالغانلىقىغا ھېچقانداق چۈشەنچە بېرىپ باقمىغان. تۇرسۇن بەختى ئىلگىرى تەڭرى تاغ رايونلۇق ج خ ئىدارىسىدە خىزمەت قىلاتتى. «5-ئىيۇل ۋەقەسى» دىن كېيىن، شەھەرلىك ج خ ئىدارىسىگە يۆتكەپ ئاپىرىلىپ ۋەقەدە ئىز-دېرەكسىز يوقاپ كەتكەنلەرنى تىزىملاش ئىشلىرىغا قويۇلغان.