Үрүмчидә турушлуқ қораллиқ сақчи қисимлири тарихий тәшвиқат - тәрбийә һәрикити елип бармақта

Үрүмчиниң уйғурлар бир қәдәр зич олтурақлашқан тәңри тағ райониға орунлаштурулған мәхсус муқимлиқ вәзийитини капаләткә игә қилиш вәзиписи йүкләнгән қораллиқ сақчи 8660 - номурлуқ қисими өткән йилидики үрүмчи вәқәсини тинҗитишта муһим рол ойниған болуп, мәзкур қисим һазир үрүмчи шәһири вә или қатарлиқ җайларда муқимлиқни қоғдаш вәзиписини атқуруш җәрянида түрлүк чарә - тәдбирләрни қолланмақта. Әнә шуларниң бири хитай рәиси ху җинтавниң үрүмчи вәқәси мунасивити билән мәхсус уйғур ели вәзийитигә асасән чиқарған "төтни тонуш" шоарини кәң тәшвиқ қилиш болуп һесаблиниду.
Мухбиримиз үмидвар
2010.08.01

Мәзкур қораллиқ сақчи қисими "төтни тонуш" тәшвиқатида тарихий тәрбийини күчәйткән болуп, улар мәхсус хитайниң "әлни идарә қилиш өрнәклири", " 25 тарих", " шинҗаңниң тарихи вә тәрәққияти" қатарлиқ китаблиридики уйғур елиға аит материялларни топлап, шинҗаңниң әзәлдин җуңгониң бир қисими болғанлиқидин ибарәт нуқтиийнәзәрни чөридигән һалда мәхсус тарихий тәшвиқат материяли түзүп, буни тәңри тағ райони тәвәсидики аһалиларға, асаслиқи уйғурларға, яш оқуғучилар вә башқиларға тәшвиқ қилған.

Шинхуа агентлиқи елан қилған мәзкур қисим һәққидики мақалидә йезилишичә, бу қошунниң асаслиқ тәшвиқат нуқтилириниң бири шинҗаң университети болуп, өткән йили 8 - айда мәзкур қисим билән шинҗаң университети һәмкарлиқ орнитип, оқуғучилар арисида тәшвиқатни қанат яйдурған. Мақалидин мәлум болушичә, бу қетимқи тәшвиқат паалийәтлиридә тарихий тәшвиқат асаслиқ нәзәрийә салмиқини игилигән болуп, илгири тарихчилар вә сиясийонлар "шинҗаң тарихи " сөзлигән болса, мана әмди һәрбий - қораллиқ сақчилар тарих сөзләшкә башлиған.
Мунасивәтлик хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.