Хитай уйғур имамларни бу җүмә хутбисидә партийә қурулғанлиқиниң 90 йиллиқини хатириләшкә буйруди
2011.06.30
Дуня уйғур қурултийиниң илгири сүрүшичә, бу мунасивәт билән даириләр уйғур елидики һәр қайси мәсчитләргә уқтуруш чүшүрүп, мәсчит имамлиридин җүмә хутбисидә партийә қурулғанлиқиниң 90 йиллиқини тәбрикләп, партийиниң милләтләр сияситини мәдһийиләп хутбә оқушни тәләп қилған.
Дуня уйғур қурултийи баянатчиси дилшат ришит, 1-июлдики җүмә намизида партийә сияситини мәдһийиләп хутбә оқуш-оқумаслиқ имамларниң “вәтәнпәрвәрлики” ни синайдиған өлчәм қилип бекитилгәнликини әскәртип, мәдһийә хутбиси оқушни рәт қилғанларниң имамлиқи елип ташлинип, мәмури вә қануни чарә көрүлидиғанлиқи агаһландурулғанлиқини билдүргән.
Дилшат ришит, хитай даирилириниң диний сорунларни сиясий тәшвиқат мәйданиға айландуруватқанлиқини тәнқидләп, уйғурларниң диний етиқади суйиистемал қилиниватқанлиқини илгири сүргән.
Хитайниң уйғур диний өлималиридин һәр җүмә хутбилиридә вә һейт намазлирида партийиниң милләтләр сияситини күйләшни тәләп қилиши йеқинқи йиллардин бери изчил оттуриға қоюп келиватқан тәләплириниң бири. Лекин бу җүмәниң партийә қурулған 1-июл билән охшаш күнгә тоғра келип қелиши вә буниңға атап хутбә оқушни тәләп қилиши тунҗи қеқимлиқтур.
Хитай даирилири 7-айниң 1-күни партийә қурулғанлиқиниң 90 йиллиқини дағдуғилиқ өткүзүшкә хелидин бери тәйярлиқ қилип келиватқан иди.