خىتاي مائارىپ مىنىستىرلىقى ئۇيغۇر ئېلىنىڭ مائارىپ ئىشلىرىغا مەسئۇل رەھبەرلىك ئىشخانىسى قۇرغان

خىتاي مائارىپ مىنىستىرلىقى يېقىندا قارار چىقىرىپ، مائارىپ مىنىستىرلىقى قارمىقىدا ئۇيغۇر ئېلىنىڭ مائارىپ ئىشلىرىغا رەھبەرلىك قىلىدىغان مەخسۇس بىر ئىشخانا تەسىس قىلغان.
ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ
2010-11-19
Share

بەزى ئانالىزچىلار بولسا، بۇ خىتاي مەركىزى ھۆكۈمىتىنىڭ ئۇيغۇر ئېلى مائارىپ ئىشلىرىغا قول تىقىشىنى كۈچەيتكەنلىكىنىڭ بىشارىتى دەپ كۆرسەتمەكتە.

خىتاي مائارىپ مىنىستىرلىقى تور بېكىتىنىڭ خەۋىرىدىن مەلۇم بولۇشىچە، خىتاي مەركىزى ھۆكۈمىتىنىڭ بۇ يىل 5‏ - ئايدا چاقىرىلغان "شىنجاڭ خىزمەت يىغىنى"نىڭ روھىغا ئاساسەن قۇرۇلغان بۇ ئىشخانا، ئۇيغۇر ئېلىنىڭ مائارىپ ئىشلىرىنى بىر تۇتاش پىلانلاش، يېتەكچىلىك قىلىش ۋە ماسلاشتۇرۇش ۋەزىپىسىنى ئاتقۇرۇدىكەن.

مائارىپ مىنىستىرلىقى پارتىيە گۇرۇپپىسىنىڭ سېكرىتارى يۈەن گۇيرېننىڭ بىۋاستە رەھبەرلىكىدىكى مەزكۇر ئىشخانىنىڭ قارمىقىدا يەنە "قوش تىللىق مائارىپ" گۇرۇپپىسى، ئوقۇتقۇچىلار قۇرۇلۇش گۇرۇپپىسى قاتارلىق 7 گۇرۇپپا قۇرۇلغان.

خىتاي مائارىپ مىنىستىرلىقى بۇ ھەقتىكى ئۇقتۇرۇشىدا، شىنجاڭ مائارىپى رەھبەرلىك ئىشخانىسىنىڭ مەسئۇلىيىتى "قوش تىللىق مائارىپ"نى ئۆز ئىچىگە ئالغان شىنجاڭ مائارىپىغا مۇناسىۋەتلىك قۇرۇلۇش ۋە مەبلەغنى بىر تۇتاش لايىھىلەش ۋە ئورۇنلاشتۇرۇشتىن ئىبارەت ئىكەنلىكىنى تەكىتلىگەن.

خىتاي دائىرىلىرى "شىنجاڭ مائارىپى رەھبەرلىك ئىشخانىسى" قۇرۇپ، ئۇيغۇر ئېلىنىڭ مائارىپ ئىشلىرىغا بىۋاستە رەھبەرلىك قىلىش قارار قىلغان بۇ ۋاقىت، يەرلىك دائىرىلەر ئۇيغۇر يەسلى مائارىپىدىن تارتىپ ئالىي مائارىپقىچە خىتاي تىلىنى ئومۇملاشتۇرۇشنى كۈچەپ يولغا قويۇپ، 2020‏ - يىلغىچە ئۇيغۇر مائارىپ سېپىدە خىتاي تىلىدا دەرس ئۆتۈشنى ئومۇملاشتۇرۇپ بولۇش پىلانىنى ئىجرا قىلىۋاتقان مەزگىلگە توغرا كەلگەن.

خىتاينىڭ رادىكال ۋاستىلارنى قوللىنىپ، ئۇيغۇر مىللىي مائارىپ تىلىنى خىتايچىلاشتۇرۇش پىلانى نۇرغۇن ئۇيغۇرلاردا ئەندىشە قوزغاپ، چەتئەلدىكى ئۇيغۇر تەشكىلاتلىرى، خەلقئارا كىشىلىك ھوقۇق ئورگانلىرىنىڭ تەنقىدىگە ئۇچرىغان ئىدى.


پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت