Ғайип адвокат гав җишеңниң из - дерики техиму сирлиқлашти

Хитайдики кишилик һоқуқ адвокатлиридин гав җишең өткән йили февралниң 4 - күни сақчилар тәрипидин тутуп кетилгәндин кейин ғайип болған. Униң нәдилики вә әһвали һәққидә аилиси вә йеқинлири ениқ бир учурға еришәлмәй келиватқан иди.

Мухбиримиз шөһрәт
2010-03-16

Бирқанчә айниң алдида чәтәлдики мәлум инсан һәқлири җәмийити гав җишеңниң уйғур елида қамақта икәнлики һәққидә учурға игә болған. Әмма, бу чурниң тоғра яки хаталиқи һәққидә хитай даирилири һәр қетим җаваб беришни рәт қилип кәлгән; буниң билән ғайип адвокат гав җишеңниң из - дерексизлик мәсилиси сирлиқлишип, хәлқара ахбаратларниң диққәт нуқтисиға айланған иди.

Бүгүн хитай ташқи ишлар министири яң җиечи әнглийә ташқи ишлар министири давид милибан билән өткүзгән қошма ахбарат йиғинида гав җишеңниң әһвали һәққидики соалға җаваб берип, гав җишеңниң дөләтни ағдуруш җинайити билән кесилгәнликини, вә униң тегишлик һәқ - һоқуқлириниң капаләт астида икәнликини билдүргән. Әмма бу җаваб гав җишеңниң әһвалини техиму сирлиқлаштуривәткән. Чүнки у 2006 - йили дөләтни ағдуруш җинайити билән әйиблинип 3 йил кесилгән ; арқидин бу һөкүм инавәтсиз қилинип, 5 йил түрмә сиртида нәзәрбәнд астида тутуш чариси көрүлгән.

Чәтәл мухбирлири гав җишең һәққидә дейилгән җазаниң бурунқи җаза яки йеңи җаза икәнликини сүрүштүрүп һечқандақ җавабқа еришәлмигән. Бүгүнки хәвәрләрдә хитай ташқи ишлар министириниң гав җишең һәққидә қарисиға җаваб бәргәнлики, әмәлийәттә гав җишеңниң нәдиликини хитай дөләт бихәтәрлик тармақлардин башқа һечкимниң билмәйдиғанлиқи оттуриға қоюлған.