Хәлқара рай синаш нәтиҗисидин қариғанда хитайниң баш көтүрүши 'яхши иш әмәс'

Рай синаш паалийитигә қатнашқан 88% японийилик, 87% франсийилик, 86% җәнубий корийилик, 79% америкилиқ вә 72% германийилик хитайниң һәрбий җәһәттин күчийишини "яхши иш әмәс" дәп қариған.

Хитай иқтисадиниң күчийишидин әнсирәйдиған кишиләр ичидә франсийиликләрниң нисбити әң көп болуп, 67% ни игилигән. Униңдин қалса тәртип бойичә германийә, америка вә әнглийә әң көп әнсирәйдиған дөләтләрдин икән. Лекин хитай африқида қарши елинидиған дөләт болуп, кенийә вә негирийиликләрниң 90% и хитайниң баш көтүрүшигә иҗабий қарайдиғанлиқини билдүргән.

Рай синаш нәтиҗисидин йәнә, һиндистанлиқларниң 44% и хитайни "дүшмән" дәп қарайдиғанлиқи, лекин пакистан билән кенийиликләрниң 84% и хитайни өзиниң шерики һесаблайдиғанлиқи мәлум болған.

Бу хуласә бу йил 4‏- айниң 7 ‏- күнидин 5 ‏- айниң 8 ‏- күнигичә һәр қайси әлләрдики 24 миң адәм үстидин елип берилған тәкшүрүшкә асасән чиқирилған.