Хитай уйғур районида дөләт байрими мунасивити билән қаттиқ тәдбирләр алмақта

16 - Синтәбир күни уйғур районлуқ қатнаш - трансипорт башқуруш идариси уқтуруш чиқирип, һәр қайси шәһәрләр арисида қатнайдиған узун йоллуқ аптобус ширкәтлиридин өктәбир байрими мәзгилидики бихәтәрликкә капаләтлик қилишни тәләп қилған. Буниң үчүн шәһәрләр ара қатнайдиған узун йоллуқ йолучилар аптобусиға чоқум бирдин аманлиқ қоғдаш хадими қоюш уқтурулған.

Мәлум болушичә, бу аманлиқ қоғдаш хадими һәр бир йолучиниң сомкисини ечип тәкшүридикән вә һәр қандақ бир гуманлиқ киши вә һәрикәткә қарита дәрһал тәдбир қоллинидикән һәмдә буни мунасивәтлик органларға мәлум қилидикән.
 
Уйғур районлуқ қатнаш - транспорт идариси һәр дәриҗилик орунлардин һәр қандақ йолучилар вә йүк аптобусини қаттиқ тәкшүрүшни, гуманлиқ әһвал вә хәтәрлик маддилар байқалғанда вақтида тәдбир елишни, йолучилар вә уларниң йүк- тақилирини қаттиқ тәкшүрүшни тәләп қилған вә һәр бир узун йоллуқ йолучилар аптобосида чоқум бирдин аманлиқ қоғдаш хадими болуши керәкликини қаттиқ тәкитлигән.

Хитай һазир дөләт байриминиң аманлиқиға капаләтлик қилиш намида пүтүн дөләт миқясида түрлүк тәдбирләрни еливатқан болуп, бейҗиң шәһиридиму 1 милйон киши коча - кочиларда чарлашқа қоюлған иди. Бу әһваллар хәлқара мәтбуатниң қаттиқ диққитини қозғимақта.