Хитай: 'гогул мәсилиси америка - хитай мунасивәтлиригә тәсир көрситәлмәйду'

Вәқә болуп бир һәптә өткәндин кейин, хитайниң бәйду издәш маториму америкиниң бир ширкитини өзигә хаккерлиқ һуҗум қилиш әйибләп, мәзкур ширкәтни әрз қилған. Әмма анализчилар буниң хитайниң гогулниң һәрикитигә қарши ойнаватқан сиясий оюни икәнликини ейтишмақта.

Пәйшәнбә күни хитай ташқи ишлар министирлиқиниң баянатчиси бу һәқтики соалларға җаваб бәргинидә, "гогулниң мәсилиси һәргизму икки тәрәп һөкүмәтлириниң вә икки дөләтниң мунасивитигә тәсир көрситәлмәйду," деди.

Гогул әгәр хитай һөкүмити интернет қамаллиқини әмәлдин қалдурмиған тәқдирдә хитай базиридин чекинип чиқидиғанлиқини билдүргән иди. Әмма хитай һөкүмити икки күнниң алдида гогул хитайда иш қилимән дәйдикән, хитайниң қанун - низамлириға әмәл қилиши керәк, деди.

Б б с ниң билдүрүшичә, хитайдики чәтәл ширкәтлириниң һәммиси дунядики әң чоң издәш матори болған гогул арқилиқ иш қилидиған болуп, гогул чекинип чиқип кәткән тәқдирдә хитай наһайити осал әһвалға чүшүп қалидикән.

Гогулниң мәсилиси оттуриға чиққандин кейин, хитайдики интернет әркинлики мәсилиси кәң муназирә қилинмақта. Бүгүн әтигән америка ташқи ишлар министири һилларий клинтон ханимму интернет әркинлики мәсилиси һәққидә нутуқ сөзләп хитайни әйиблиди.