Хитайниң нобил мукапатини тапшурувелиш мурасимиға тосқунлуқ қилиш һәрикәтлири давам қилмақта

Бирләшмә агентлиқниң хәвәр қилишичә, нобил саһиби лю шавбониң адвокатлиқини қилған ширкәтниң адвокатлиридин мо шавпиң бүгүн, лондонда ечилидиған бир йиғинға бериш үчүн йолға чиққанда бейҗиң айродромида тосувелинип сәпәрдин тохтитип қоюлған.
Мухбиримиз шөһрәт һошур
2010-11-09
Елхәт
Пикир
Share
Принт

Сақчилар мо шавпиңға ениқ һалда униң бу сәпириниң хитайниң дөләт бихәтәрликигә зиянлиқ икәнликини билдүргән. Хитайниң мо шавпиңни лю шавбоға вакалитән мукапатни тапшурувалғили кетиватиду дегән гуман билән тосуп қалғанлиқи мәлум болмақта.

Хитай өткән һәптә ғәрб дөләтлиригә норвигийидики нобил мурасимға вәкил әвәтмәслик һәққидә тәләп сунғанда, охшаш тәләпни японийигиму сунған болуп, бүгүн японийә баш министири нобил мукапатниң универсал қиммәткә игә икәнликини тәкитләп, нобил саһиби лю шавбониң қоюп берилишини үмид қилидиғанлиқини билдүргән.

Франсийә ташқи ишлар министири бүгүн норвигийидики франсийә баш әлчисиниң мурасимға қатнишидиғанлиқини уқтурған. Нобил комитетиниң секритари бүгүн мухбирларға қилған сөзидә, лю шавбониң аялиниң мурасимға қатнишип мукапат тапшурувелишини һелиһәм үмид қиливатқанлиқини билдүргән.

Хитай мәзкур мурасимға дипломатик вастилар арқилиқ тосқунлуқ қилиштин башқа, лю шавбониң аяли қатарлиқ 20 дин артуқ өктичи паалийәтчиләрни нәзәрбәнд астиға елип, нобил мукапати хәвәрлиригә қарита ахбарат чәклимисини давам қилмақта.

Пикирләр (0)
Share
Толуқ бәт