“Walstrirt zhurnili géziti” xitay puqralirining pullirini chet'elge yötkewatqanliqini ashkarilidi

Mezkur gézitke 3-yanwar seyshenbe küni bésilghan “Xitay puqraliri chamadanda neq pul toshuydu” namliq maqalidin melum bolushiche, 2011-yili 11-aydin 2012-yili 6-ayghiche kanadadiki torunto we wankowér ayrodromi xitay puqralirining melum qilmay chégradin ötküzüshke urun'ghan neq pulidin 13 milyon dollarni musadire qilghan. Amérika ayrodromliridiki tamozhna xadimliri xitay puqralirining chet'ellerdin neq pul élip kiridighan ikkinchi chong menbe ikenlikini ashkarilighan. Melum bolushiche, 2009-yilidin 2011-yilighiche tamozhna xadimliri xitay puqralirining melum qilmay élip kirgen neq pulidin 5 milyon dollarni musadire qilghan.

Maqalide yene, xitay puqraliri arisida barghanche küchiyiwatqan xitayda öz bayliqining bixeterlikidin ensiresh tuyghusining ularning bayliqlirini bir amal qilip amérika, kanada we yawropa döletlirige yötkishige seweb boluwatqan amillarning biri ikenliki ilgiri sürülgen. Epsuski, xitay emeldarliri arisidiki parixorluq we xiyanet bilen béyighan bir tüküm milyonérlarning bala-chaqiliri we uruq-tughqanliri arqiliq nurghun bayliqini chet'ellerge yötkep chiqiwatqanliqi metbu'atlarning qiziq témisigha aylan'ghan xewerliri arisida yer almaqta.