بېيجىڭدا بۈگۈندىن باشلاپ ئىككى چوڭ يىغىننى قوغداش ئۈچۈن قاتتىق تەدبىر ئېلىنماقتا

ب ب س نىڭ بايان قىلىشىچە، بېيجىڭ دائىرىلىرى بۈگۈن سائەت 0 دىن باشلاپ قاتناش ۋاستىلىرىنى قاتتىق تەكشۈرۈش تەدبىرىنى يولغا قويدى. بۇ تەدبىر بۇيىچە، تيەنئەنمېن ئەتراپىدىكى كوچىلاردا كىنىشكىسىز سودىگەرلەرنىڭ ئايلىنىپ يۈرۈشى، مال سېتىش ئېلانلىرىنىڭ تارقىتىلىشى، تىلەمچىلىك قاتارلىقلار چەكلىنىدىكەن.

گۈزەتچىلەر بېيجىڭدىكى 6 چوڭ رايوننىڭ ھەممىسىدە 24 سائەت ئۈزلۈكسىز گۈزەت قىلىدىكەن. سىرتنىڭ ئاپتوموبىللىرى بەشىنچى ئايلانما يولنىڭ ئىچىگە كىرىشكە رۇخسەت قىلىنمايدىكەن.

3 ‏ - ئاينىڭ 2 ‏ - كۈنىدىن 15 ‏ - كۈنىگىچە يەنە، تيەنئەنمېن مەيدانىنى مەركەز قىلغان 200 كىلومېتىر ئارىلىقتا تىجارەت ئېلانى چىقىرىدىغان ھەرخىل شارلارنى ئۆز ئىچىگە ئالغان ھەر قانداق نەرسىنى ئۇچۇرتۇش چەكلىنىدىكەن. ساقچى دائىرىلىرى ھەتتا ئىككى چوڭ يىغىن مەزگىلىدە، ئاۋىئاتسىيە كىلوبىنىڭ ئايرۇپىلانلىرىدىكى پىلدىرلىغۇچنى چىقىرىپ تاشلاشنى تەلەپ قىلغان.

خىتاينىڭ ئوت ئۆچۈرۈش تارماقلىرى ھازىردىن باشلاپلا، ئىككى چوڭ يىغىن ئېچىلىدىغان جايلاردا مانېۋىر ئۆتكۈزۈشكە باشلىغان.