Хитай рабийә қадир ханимниң диалог тәлипини рәт қилди

Уйғур аптоном районлуқ һөкүмәт даирилири рабийә қадир ханимниң сөһбәт қилиш тәлипини рәт қилған. Фирансийә агентлиқиниң хәвәр қилишичә, уйғур аптоном районлуқ һөкүмәтниң баянатчиси ху хәнмин бу һәқтә дөләт теливизийисидә сөз қилип, рабийә қадир ханимниң хитай һөкүмити билән сөһбәт елип бериш салаһийтигә игә әмәсликини ейитқан.
Мухбиримиз ирадә
2009.09.03

Дуня уйғур қурултийиниң рәһбири рабийә қадир ханим белгийә пайтәхти берюсилда яврупа парламенти кишилик һоқуқ комитети билән көрүшкәндә, өзиниң хитай даирилири билән бивастә сөһбәт өткүзүшкә тәйяр икәнликини ейтип: " мән хитай һөкүмити билән сөһбәт өткүзүшкә тәйяр, хитай һөкүмитиниң биз билән олтуруп йүз туранә диалог қилидиған вақти йетип кәлди. Биз уларға миллий сияситидики кәмчиликләрни көрситип берәләймиз," дегән иди.
 
Биринчи синтәбир күни яврупа парламенти инсан һәқлири комитетиниң башлиқи һәйди һаутала ханимму рабийә ханимниң мәзкур парламенттики зиярити җәрянида 5 - июл үрүмчи вәқәси һәққидә мустәқил тәкшүрүш елип бериш тәлипини қоллап: " мән уйғур районида һәр тәрәптин хәлқаралиқ мустәқил тәкшүрүш арқилиқ ениқлаш зөрүр болған инсан һәқлири дәпсәндичиликлири мәвҗут дәп қараймән," дәп көрсәткән иди.

Бүгүн хитай ташқи ишлар министирлиқи буниңға дәрһал инкас қайтуруп 5 - июл үрүмчи вәқәсиниң хитайниң ички иши икәнликини алаһидә тәкитлиди вә :" җуңго һөкүмити хәлқниң бихәтәрлики, җәмийәтниң муқимлиқи, милләтләрниң иттипақлиқи вә дөләтниң бирликини қанун арқилиқ капаләткә игә қилиду. Бу хитайниң ички иши, буниңға һечқандақ дөләт вә тәшкилатниң арилишиш һоқуқи йоқ" деди.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.