Xitay tömüryol da'iriliri, shangxeydin Uyghur ili, tibet we béyjinggha qatnaydighan poyiz béletlirini isimgha qarap sétishni yolgha qoydi

Da'iriler, buningdin bir qanche ay ilgiri Uyghur élide uzun yolluq aptobuslargha isim bilen bilet sétishni yolgha qoyghan. Shangxey tömür yol idarisining yéngi belgilimiside körsitilishiche, eger yoluchi kimlikini körsetmise we kimliktiki isim bilen bilettiki isim mas kelmise, poyizgha chiqishigha ruxset qilinmaydiken.

Lékin xitay axbarat wasitilirining bu heqtiki xewerliride, da'irilerning bu xil tüzümni yolgha qoyushqa néme zörüriyet hés qilip qalghanliqi tilgha élinmighan. Közetküchilerning ilgiri sürüshiche, bu xil belgilimining yolgha qoyulushi, Uyghur we tibet aptonom rayonlirining weziyiti yéqindin buyan dawamliq ötkürlishiwatqanliqi bilen munasiwetlik.

Bu, xitay tömür yol qatnash sistémisi Uyghur yaki tibetlerning tasadipiy hujumigha uchrishidin xewpsirewatqanliqini körsitidu. Lékin dunya Uyghur qurultiyi bayanatchisi dilshat rishit xitay tömür yol da'irilirini tenqid qilip, mezkur belgilime mexsus Uyghur, tibet qatarliq milletlerni nishan'gha alghan, kishilik hoquqqa xilap kemsitish xaraktérlik tedbir, körsetti.

Xitay tömür yol da'iriliri ötken yildin bashlap isim bilen bilet sétishni yolgha qoyghan bolsimu, biraq tömür yol wogzalliri peqet gumanliq, dep qarighan Uyghur, tibet we bashqa yoluchilarningla kimlikini tekshürüp kelgen.