Луңнәндә йүз бәргән наразилиқ намайишида 100 дин артуқ адәм қолға елинған

Хәвәрдә йәнә, сақчиларниң бу қетим йүз бәргән вәқәгә четишлиқ 110 кишини қолға елип, 80 кишини қоюп бәргәнлики тәкитләнгән болуп, вәқә йүз бериш давамида 71 сақчи вә 3 мухбирниң яриланғанлиқи, 110 еғиз өз вә 22 аптомобилниң вәйран қиливетилгәнлики қәйт қилинған.

Гәнсу өлкиси луңнән шәһиридә тәхминән 2000 киши өз маканлиридин мәҗбурий көчүрүлүш вә һөкүмәт тарқитип бәргән чидир өйләрни тартивелиш сәвәбидин зор көләмлик наразилиқ намайиши елип барған иди. Шинхуа агентлиқи, намайишчиларниң аптомобилларни уруп чаққандин сирт, һөкүмәт ишханисиға һуҗум қилип, сақчи, һөкүмәт хадимлири шуниңдәк мухбирларни уруп зәхмиләндүргәнликини тәкитлимәктә.

Вәқә йүз бәргән җайдики бир компартийә әзасиниң билдүрүшчә, қаршилиқ билдүрүш җәрянида яриланған 10 нәпәр сақчи билән 1 нәпәр мухбир һазирға қәдәр дохтурханида даваланмақта икән. Бирақ истансимиз игилигән әң йеңи хәвәрләрдин мәлум болушичә, нөвәттә вәқә йүз бәргән районда һәрбий һаләт йүргүзүлгән шуниңдәк 3 тин артуқ адәмниң бир йәргә йиғилиши чәкләнгән вә һазирға қәдәр 100 дин артуқ адәмниң қолға елинип қоюп берилмигәнлики, телефун вә интернет вастилири арқилиқ мунасивәтлик учурларниң сиртқа тарқилишини қаттиқ контрол астиға елинғанлиқи ашкариланди.