ياۋروپا-ئامېرىكا قىسىملىرىنىڭ ھاۋا ھۇجۇمى كازافىينىڭ مۇداپىئە كۈچلىرىنى ئۈنۈملۈك پاچاقلىدى

ب ب س نىڭ بايان قىلىشىچە، ب د ت نىڭ لىۋىيىدە ئۇچۇشقا بولمايدىغان رايون بەلگىلەش قارارىنى ئىجرا قىلىش ئۈچۈن يەكشەنبە كۈنى ئېلىپ بېرىلغان ھەربىي ھەرىكەتكە ياۋروپا، ئامېرىكا قىسىملىرىنىڭ 19 ھۇجۇمچى ئايروپىلانى قاتناشتى. بۇنىڭ ئىچىدە 2 سى ب-2 بەلگىلىك مۇسپى بومباردىمانچى.
مۇخبىرىمىز ۋەلى
2011-03-21
Share

ئەرەب بىرلىكىنىڭ ئەزاسى بولغان قاتارمۇ بۇ ھەرىكەتكە 4 بومباردىمانچى ئەۋەتتى. بۇ قېتىمقى ھەربىي ھەرىكەتتە ياۋروپا-ئامېرىكا قىسىملىرى كازافىينىڭ ھاۋا مۇداپىئە كۈچلىرىگە ئۈنۈملۈك زەربە بەردى.

فرانسىيە ئاگېنتلىقىنىڭ بايان قىلىشىچە، كازافىيغا قارشى قوزغىلاڭچىلار، غەرب دۆلەتلىرىنىڭ تۈنۈگۈنكى ھاۋا ھۇجۇمىدا كازافىينىڭ بەنغازىدىكى بىر نەچچە ئون تانكا-برونىۋىكلىرى پاچاقلانغانلىقىغا تەنتەنە قىلدى.

بىرلەشمە ئاگېنتلىقىنىڭ بايان قىلىشىچە، لىۋىيىدە ئۇچۇشقا بولمايدىغان رايون بەلگىلەش ھەققىدە ب د ت قارار ماقۇللىغاندا ئاۋاز بېرىشتىن ۋاز كەچكەن خىتاي بۈگۈن، غەرب دۆلەتلىرىنى، لىۋىيىگە ھۇجۇم قىلىپ خەلقئارا قانۇنغا خىلاپلىق قىلدى، دەپ ئەيىبلەپ ئوتتۇرىغا چىقتى. شۇنداقلا ئۇنى، ئامېرىكا يېتەكچىلىكىدىكى ئىراق ۋە ئافغانىستان ئىشغالىيىتىنىڭ داۋامى دەپ جاكارلىدى.

ئەمما، خىتاينىڭ باياناتىدىن كېيىنلا، ئەرەب بىرلىكىنىڭ باش كاتىپى مۇسا بايانات ئېلان قىلىپ، ب د ت نىڭ كازافىيغا ھەربىي ھەرىكەت قوللىنىش توغرىسىدىكى قارارىغا ھۆرمەت قىلىدىغانلىقىنى جاكارلىدى. تەھلىل قىلىنىشىچە، خىتاي ھازىر لىۋىيە مەسىلىسىدە ئامېرىكا بىلەن بىۋاسىتە سۆھبەتلىشىدىغان چوڭ دۆلەت بولۇۋالماقچى.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت