خىتاي يەنە 5 نەپەر ئۇيغۇرنى ئۆلۈمگە ھۆكۈم قىلدى

شىنخۇئا ئاگېنتلىقىنىڭ خەۋەر قىلىشىچە، خىتاي سوتى تۈنۈگۈن "5 ‏ - ئىيۇل" تۇتقۇنلىرىدىن يەنە 13 كىشى ئۈستىدىن ھۆكۈم ئېلان قىلغان. ھۆكۈمدە 5 نەپەر ئۇيغۇر ئۆلۈمگە، 8 نەپىرى مۇددەتلىك ۋە مۇددەتسىز قاماق جازاسىغا بۇيرۇلغان.
ﻣﯘﺧﺒﯩﺮﯨﻤﯩﺰ ﺷﻮﻫﺮﻩﺕ ﻫﻮﺷﯘﺭ
2010-01-26
Share

خەۋەردە بىلدۈرۈلۈشىچە، بۇ 13 نەپەر مەھكۇم، 5 ‏- ئىيۇلدىكى 5 ئايرىم دېلوغا چېتىلىپ سوتلانغان. ئۆلۈمگە بۇيرۇلغانلار ئالىم ئابدۇۋەلى، ئابدۇكېرىم ئابلەت، ئالىمجان ئەركىن، قۇربانجان ھۈسەيىن، يۈسۈپقادىر ئابدۇكېرىم قاتارلىقلار بولۇپ، بۇلاردىن يۈسۈپقادىر ئابدۇكېرىم 2 يىللىق كېچىكتۈرمە ئۆلۈم جازاسىغا بۇيرۇلغان.

دۇنيا ئۇيغۇر قۇرۇلتىيىنىڭ باياناتچىسى دىلشات رىشىت بۈگۈن رويتېرىس قاتارلىق خەلقئارالىق ئاخبارات ئورگانلىرىغا بايانات بېرىپ، خىتاينىڭ ئۆلۈم جازالىرى بىلەن رايوندا مۇقىملىقنى قوغدىيالمايدىغانلىقىنى يەنە بىر قېتىم تەكىتلىگەن.

بىرلەشكەن دۆلەتلەر تەشكىلاتىنىڭ ئىنسان ھەقلىرى ئالى كومىتېتىنىڭ مەسئۇلى ئۆتكەن يىلى سېنتەبىر ئېيىدا، 5 - ئىيۇل ۋەقەسى ھەققىدە توختىلىپ، خىتاينى ۋەقەنى بىر تەرەپ قىلىشتا ۋەقەنى كەلتۈرۈپ چىقارغان يىلتىز خاراكتېرلىك سەۋەبلەرنى كۆزدىن كەچۈرۈشكە چاقىرغان ئىدى.

خىتاينىڭ 5 ‏- ئىيۇل مەسىلىسىدە خەلقئارا جامائەتنىڭ پىكىر ۋە چاقىرىقلىرىغا پەرۋا قىلمايۋاتقانلىقى ئاشكارا كۆرۈلمەكتە. نۆۋەتتە ئۇيغۇر تەشكىلاتلىرى خەلقئارا جامائەتنىڭ بۇنىڭدىن كېيىن خىتايغا تۇتىدىغان پوزىتسىيىسىنى دىققەت بىلەن كۆزەتمەكتە.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.