دالاي لاما ئالاھىدە ئەلچى دوبرىئانىسكي بىلەن مىچىگان ئۇنىۋېرسىتېتىدا ئۇچراشتى

ھازىر ئامېرىكىدا زىيارەتتە بولۇۋاتقان تىبەتلەرنىڭ روھانىي داھىيسى دالاي لاما، تىبەتتە يۈز بەرگەن خىتاي ھۆكۈمىتىگە قارشى نامايىشلار ۋە تىبەتلەر بىلەن ھۆكۈمەت ئارىسىدىكى توقۇنۇشلارنى ھەل قىلىش ئىشلىرىدا تىبەت خەلقىنىڭ ئامېرىكا ھۆكۈمىتىنىڭ ئارىلىشىشىغا موھتاج ئىكەنلىكىنى بىلدۈرگەن.
ﻣﯘﺧﺒﯩﺮﯨﻤﯩﺰ ﺟﯜﻣﻪ ﺧﻪﯞﯨﺮﻯ
2008.04.21

 بىرلەشمە ئاگېنتلىقىدا خەۋەر قىلىنىشىچە، دالاي لاما ئامېرىكا ھۆكۈمىتىنىڭ تىبەت مەسىلىسىدىكى ئالاھىدە ئەلچىسى ۋە مۇئاۋىن تاشقى ئىشلار مىنىستىرى پائۇلا دوبرىئانىسكي بىلەن مىچىگان ئۇنىۋېرسىتېتىدا كۆرۈشكەندە " بىز سىلەرنىڭ ياردىمىڭلارغا موھتاج" دېگەن.

دوبرىئانىسكي، مەزكۇر ئۇچرىشىشنىڭ تىبەت مەسىلىسى سۆھبىتىنى مۇھىم پۇرسەت بىلەن تەمىنلەيدىغانلىقىنى بىلدۈرگەن ھەمدە ئامېرىكا ھۆكۈمىتىنىڭ تىبەتنىڭ يېقىنقى ۋەزىيىتىگە كۆڭۈل بولۇپ كېلىۋاتقانلىقىنى ، بولۇپمۇ پرېزىدېنت بۇشنىڭ خىتاي ھۆكۈمىتىنىڭ بۇ مەسىلىلەر ئۈستىدە دالاي لاما بىلەن سۆھبەت ئۆتكۈزۈشى كېرەكلىكىنى ئىزچىل قوللاپ كېلىۋاتقانلىقىنى بىلدۈرگەن.

دالاي لاما يەكشەنبە كۈنى مىچگان ئۇنىۋېرسىتېتىدا نۇتۇق سۆزلىگەن ھەمدە پائۇلا دوبرىئانىسكي بىلەن يېپىق ھالەتتە سۆھبەت ئېلىپ بارغان.

دالاي لاما مۇشۇ سەيشەنبە كۈنى نيۇيورك شەھىرىگە كېلىپ ھامىلتونغا جايلاشقان كولگەيت ئۇنىۋېرسىتېتىدا نۇتۇق سۆزلەيدۇ ۋە پەيشەنبە كۈنى ھىندىستاندىكى تىبەتلەرنىڭ سۈرگۈندىكى ھۆكۈمىتى جايلاشقان دارامسالاغا قايتىدۇ.
پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.