Хитай билән сүргүндики тибәт һөкүмитиниң сөһбити бейҗиңда башланди

Далай ламаниң вәкиллири мушу сәйшәнбә күнидин башлап хитай тәрәп билән тибәт мәсилисидә сөһбәт елип баридиған болуп, сүргүндики тибәт һөкүмитиниң ашкарилишичә, бу нөвәтлик сөһбәт бейҗиңда елип берилип икки күн давам етидикән.
Мухбиримиз җүмә хәвири
2008.06.30

 Мәзкур сөһбәткә тибәт тәрәптин лоди гяри вә келсаң гялтсәнләр қатнишидиған болуп, тибәт сүргүндики һөкүмити баш министири самдһоң ринпоче бу нөвәтлик сөһбәтниң 2002 - йили башланған тибәт - хитай диалогиниң давами икәнликини билдүргән.

Бирләшмә агентлиқиниң тибәт сүргүндики һөкүмитиниң баянатидин нәқил елип көрситишичә, далай лама вәкиллирини тибәт хәлқи өз вәтинидә йолуқуватқан қийинчилиқларни яхшилаш җәһәттә көрүнәрлик илгириләш һасил қилиш үчүн барлиқ тиришчанлиқларни көрситишкә чақирған.

Далай лама вәкиллириниң хитайға сөһбәткә келидиғанлиқи хитайниң һөкүмәт радио вә гезитлиридиму хәвәр қилинған болуп, шинхуа ахбаратида һөкүмәт һөҗҗәтлиридин нәқил елип хәвәр қилишичә, хитай һөкүмити далай лама билән елип берилидиған сөһбәтләргә өз ишикиниң даим очуқ икәнликини илгири сүргән һәмдә далай лама тәрәпниң хитай мәркизи һөкүмитиниң тәләплиригә иҗабий инкас қайтурушини үмид қилидиғанлиқини билдүргән.

Дүшәнбә күни хитай зияритини аяғлаштурған америка ташқи ишлар министири кондализа райсму хитай тәрәпни далай ламаниң вәкиллири билән сөһбәт өткүзүшкә риғбәтләндүргән иди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.