Merhum dini alim abdulhekimxan mexsum hajimning jinaza namizi oquldi

Ixtiyariy muxbirimiz arslan
2016-12-23
Élxet
Pikir
Share
Print
Merhum dini alim abdulhekimxan mexsum hajimning jinaza namizi oqulmaqta
Merhum dini alim abdulhekimxan mexsum hajimning jinaza namizi oqulmaqta
RFA/Arslan

Sherqiy türksitan ma'arip we hemkarliq jem'iyitining qurghuchisi dini alim abdulhekimxan mexsum hajim 2016-yili 12-ayning 22-küni tuyuqsizla waqitsiz bu dunya bilen widalashti. 12-Ayning 23-küni merhumning jinaza namizi zeytinburnu amine inanch jam'ide oquldi we zeytinburdiki kozlu mazarliqighida yerlikige qoyuldi.

Merhumning jinaza namizini oghli abdusalam qarim imam bolup oqudi. Jinaza namizigha, türkiyediki her qaysi jayliridiki Uyghur teshkilatning rehberliri, dini ölimalar, doktur-proféssurlar, ziyaliyilar, yashlar we Uyghurlarning dostliri bolup 2000 etrapida kishi qatnashti.

Jinaza namizigha yene zeytinburnu sheher bashliqi murat aydin, sabiq parlamént ezasi jalal erbay, türkiye bash ministirning meslihetchisi ömer faruq qorqmaz, dunya Uyghur qurultiyining mu'awin re'isi siyt tumtürk, yawro-asiya türk jem'iyetler fédératisiyesining re'isi isma'il jén'giz qatarliq rehberlerning qatnishishi bilen birge merhumning dunyaning her qaysi jayliridini sepdashliri hem oqughuchiliri shundaqla gérmaniye, shwétsiye, norwigiye, gollandiye, se'udiy erebstan, qazaqistan qatarliq döletlerdin bir türküm Uyghur wekillermu qatnashti.
abdulhekimxan-mexsum-jinaza-istanbul-turkiye-2016-2.jpg
Jinaza namizi murasimida merhumning oghli abdusalam teklimakan qisqiche söz qilip dadisi abdulhekimxan mexsumdin jama'etning razi bolup kétishini, eger maddi meniwiy mu'amilisi bolsa özining béridighanliqini bildürdi. Jama'et birdek razi bolduq, dédi.

Sherqiy türkistan ma'arip hemkarliq jemiyiti re'isi hidayitulla oghuzxan, sherqiy türkistan ölimalar birliki re'isi atawulla shahyar qatarliqlar merhum heqqide qisqiche toxtilip ötti.

Sherqiy türksitan ma'arip we hemkarliq jem'iyitining re'isi hidayetulla oghuzxan söz qilip abdulhekimxan mexsum hajimning hayat-ish izliri toghrisida toxtaldi.
abdulhekimxan-mexsum-jinaza-istanbul-turkiye-2016-3.jpg
Hidayetulla oghuzxan sözide, abdulhekimxan mexsum hajimning hayati boyiche Uyghurlarni ittipaqlashturush, birlik hasil qilishqa tirishchanliq körsitip kelgenlikini, her zaman Uyghur musulmanlarning zulumdin qutulushi üchün xizmet qilip kelgenlikini, uning miras qaldurup ketken yoldin méngish hayat qalghanlarning üstige yüklen'gen bir wezipe dep bilidighanliqi we merhumning yolida méngip weten xelq üchün netijilik xizmetlerni qilishqa teyyar ikenlikini ipadilidi.

Proféssor jelal erbayning merhum heqqidiki tesirlik du'asidin kéyin érigen qelbler, yashlan'ghan közler, ghemkin we musibetlik wujudlar yéghiwatqan yamghurgha qarimastin ustazning jinazisini qolmu-qol kötürüp tekbir sadaliri ichide bir kilométirdin artuq yergiche élip kélishti.

Jinaza namizi zeytinburnudiki kozlu qebristanliqigha élip bérildi. Merhumni yerlikige qoyush jeriyanida qur'an tilawet qilindi, rohigha du'a oquldi. Dini alim ibrahim damollam qebre béshida merhumgha xitab qilip yürek sözlirini anglatti. Ibrahim damollamning tesirlik sözlirining anglighan qebre béshidikiler yigha-zar qiliship köz-yashlirini tutalmidi. Merhumning gunahlirining meghpiret, yatqan yérining jennette bolushi üchün du'a qildi.
abdulhekimxan-mexsum-jinaza-istanbul-turkiye-2016-4.jpg
Ibrahim damollam sözide yene merhumning bir arzusi bolsa Uyghurlar arisida birlikni qolgha keltürüp, küch hasil qilish ikenlikini otturigha qoydi we uni emelge ashurush üchün wede berdi we kishilerdin wede aldi.

Depine ishliri tamlighandin kéyin sherqiy türkistan ma'arip we hemkarliq jem'iyitining zeytinburnu shöbiside yighilip du'a tilawet qilindi. Dunyaning her qaysi jayliridin kelgen Uyghur wekiller merhum toghrisida yürek sözlirini bayan qilishti.

Se'udiy erebistandin jinaza namizigha kelgen Uyghur mötiwerliridin sirajidin ezizi ependi söz qilip, merhum toghrisida toxtaldi we se'udi erebistandiki Uyghurlarning salamini élip kelgenlikini bildürdi.

Toluq bet