Түркийәдә анилар күнидә уйғур аяллириға атап паалийәт өткүзүлди

Ихтиярий мухбиримиз әркин тарим
2013.05.13
istanbulda-anilar-kuni-305 2008 ‏- Йили 5 ‏- айниң 10 ‏- күни истанбулда йашаватқан уйғур айаллар шәрқий түркистан вәхпигә топлишип, анилар күни паалийити өткүзди.
RFA Photo

Бу йил түркийәниң әң чоң партийилиридин бири болған милләтчи һәрикәт партийисиниң қәйсәри шөбисиниң аяллар комитети уйғур анилириға атап мәхсус паалийәт өткүзди.

Партийә рәһбәрлиридин сәвим қочйигит ханим билән нурхан сағлам ханим гүл вә совғатларни елип қәйсәридики уйғур мәһәллисигә берип уйғур анилиридин һал сориди, шундақла түрк ханим қизлириға вакалитән уйғур ханим қизлириниң байримини тәбрикләйдиғанлиқини билдүрди.

Кейин 10-май күни әрҗийәс теғи етикидики бир катта ресторанда уйғур анилириға атап мәхсус паалийәт өткүзүлди. Паалийәткә уйғур вә түрк аяллиридин болуп 150 әтрапида киши қатнашқан болуп, паалийәттә вәтәндики уйғур анилириниң мәсилилири һәққидә сөһбәт елип берилди.

Милләтчи һәрикәт партийиси вилайәтлик аяллар комитети мәсули нурхан сағлам ханим бу паалийәтни елип бериштики мәқсити һәққидә тохтилип мундақ деди:
“биз анилар күнини һәр йили охшимиған шәкилдә өткүзүвататтуқ. Бу йил қериндаш уйғур хәлқиниң хитайға қарши елип бериватқан күришини қоллап қуввәтләйдиғанлиқимизни ипадиләш үчүн бу йилқи анилар күнини уйғур ханим-қизлири билән бирликтә өткүзәйли дедуқ. Биз бир мәзгил шәрқий түркистан дәвасиға таза көңүл бөләлмәй қалған идуқ. Сизгиму мәлум партийимиз бурундин тартип шәрқий түркистан дәвасиға йеқиндин көңүл бөлүп кәлгән бир партийә. Буниңдин кейинму шәрқий түркистан дәвасини давамлиқ һалда қоллашқа давам қилимиз. Йиғиндиму дәп өттүм, шәрқий түркистан аммиви тәшкилатлириға қолимиздин келишичә ярдәм қилимиз. Уйғур анилириниң көз йеши төкмәслики үчүн қолимиздин кәлгәнни қилимиз.”

Биз уйғур ханим-қизлириға вакалитән бу паалийәткә қатнашқан заһидә қаһраман ханим биләнму сөһбәт елип бардуқ. У сөзидә қәйсәридә өткүзүлгән паалийәткә 150 әтрапида аял қатнашқанлиқини дуня уйғур аяллири бирликигә вакалитән рабийә илтүрк ханим башчилиқида 15 уйғур аялниң қатнашқанлиқини, түрк аялларға көкбайрақ журнили билән шәрқий түркистанниң ай юлтузлуқ көк байриқини тәқдим қилғанлиқини ейтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.