Д у қ 6-нөвәтлик қурултийиниң тәйярлиқ хизмәтлири германийәдә рәсмий башланди

Ихтиярий мухбиримиз әкрәм
2017.08.18
duq-5-qurultay-xatire-suret.jpg Д у қ 5-нөвәтлик омумий вәкилләр қурултийида хатирә сүрәт. 2016-Йили 13-июл, париж.
RFA

Д у қ рәһбәрлириниң бәргән мәлуматлириға асасланғанда, д у қ даимий комитетиниң 8-айниң 5-күни өткүзүлгән кеңәйтилгән телефон йиғининиң қарари һәмдә д у қ рәиси рабийә ханимниң 8-айниң 13-күни д у қ ниң мюнхендики баш штабида чақирған муһим йиғининиң роһиға бинаән, бу йил 11-айниң 10-күнидин 12-күнигичә германийәниң берлин шәһиридә чақирилидиған пәвқуладдә қурултайниң тәйярлиқ хизмәтлирини җиддий елип бериш вәзиписи қурултай баш катиплиқиға тапшурулған.

Д у қ муавин рәиси пәрһат муһәммиди әпәнди бүгүн бу мунасивәт билән пикир баян қилип, пәвқуладдә қурултай чақириш ялғуз д у қ ниң ички кризисиниң әмәс, бәлки уйғур диярида нөвәттә һөкүм сүрүватқан җиддий вәзийәтниң тәқәззаси икәнликини илгири сүрди.

Д у қ баш катипи, у н п о ниң муавин рәиси долқун әйса әпәнди болса, пәвқуладдә қурултай тәйярлиқ комитети тәсис қилиш, пәвқуладдә қурултайға қатнишиш салаһийитигә игә вәкилләрниң тизимликини турғузуп чиқиш, қурултайниң иқтисадий чиқимлирини қамдаш, қурултайниң программилирини һазирлаш вә қурултайда һәл қилидиған мәсилиләрниң темилирини турғузуш қатарлиқ хизмәтләрниң рәсмий күнтәртипкә кәлгәнликини тилға алди.

Д у қ муавин рәиси өмәр қанат әпәндиму өзиниң пәвқуладдә қурултайниң тәйярлиқ хизмәтлири тоғрисидики қарашлирини баян қилип, бу қетимқи қурултайниң рәһбәрлик қатлимида муһим өзгиришләрниң рояпқа чиқидиғанлиқини әскәртти.

Пәрһат муһәммиди әпәнди, бу қетимқи пәвқуладдә қурултайниң түп мәқсәтлириниму изаһлап өтүп, бу қурултайниң уйғур миллити үмид қилғандикидәк нәтиҗиләрни вуҗудқа чиқиридиғанлиқини тәкитлиди.

Долқун әйса әпәнди сөзидә, муһаҗирәттики уйғур җамаитини бирлик, иттипақлиққа чақирип, пәвқуладдә қурултайни маддий һәм мәниви тәрәпләрдин қизғин қоллашни мураҗиәт қилди.

Пәрһат муһәммиди әпәнди сөзиниң хатимисидә йәнә, пәвқуладдә қурултайниң тарихий әһмийәткә игә бир йиғин болидиғанлиқини, йиғинниң нәтиҗисигә өзиниң үмид билән қарайдиғанлиқиниму әскәртти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.