Enqerede ikki qétim partlash yüz bérip 100 etrapida adem ölgen

Enqere shehiride partlash yüz bergen orunning körünüshi. 2015-Yili 10-öktebir, türkiye.

Shenbe küni etigen türkiyening enqere shehiride ikki qétim partlash yüz bérip 100 etrapida adem ölgen, 246 adem yarilan'ghan.

Enqere da'irilirining bildürüshiche, yéqini zaman türkiye tarixidiki eng ejellik hésablinidighan bu partlashta az dégende 97 adem ölgen.

Partlash enqere sheherdiki asasiy wogzal etrapida yüz bergen. Partlashta wogzalining ishik-dérizilirimu oxshimighan derijide weyran bolghan.

Partlash türk hökümiti bilen kurd ishchilar partiyesi (pkk) arisida tinchliqi ornitishni telep qilip élip bériliwatqan namayish dawamida yüz bergen. Eyni chaghda neq meydanda 1400 adem namayishqa qatnishiwatqan iken.

Bomba etige sa'et 10 din sel ötkende partlighan. Halbuki, bombining adembomba ikenliki, yaki namayishtin burun ornitilghanliqi téxi éniqlanmighan.

Hazirche héchqandaq bir teshkilat otturigha chiqip mezkur bomba hujumdiki mes'uliyetni üstige alidighanliqini jakarlimighan.

Bu yéqindin buyan türkiyede yüz bergen ikkinchi qétimqi chong térrorluq hujumi.

Bu yil 20-iyul türkiyening suruj shehiride oxshash shekildiki namayish bomba hujumigha uchrap 33 adem qaza qilghan idi.

Kéyin da'iriliri hujumning adembomba hujumi ikenliki, hujumni islam dölitini yaqilaydighan bir ayal hujumchi qilghanliqini bildürgen.

Melum bolushiche, türkiye nöwette kurd topilangchiliri we islam döliti bilen bolghan toqunushqa munasiwetlik térrorluq, siyasiy muqimsizliq, iqtisadiy ensizlik we türkiyede barghanche köpiyiwatqan süriye musapirliri qatarliq bir nechche türlük turaqsizliq amillirigha duch kelgen.

Bu yildin buyan türkiyede saqchi, herbiy xadimlargha qaritilghan térrorluq hujumliri köpeygendin kéyin, türkiye iraq we süriyening türkiyege chégrilinidighan jayliridiki kurd qoralliq küchlirige qaritilghan herbiy heriketlerning salmiqini ashurghan idi.