Әрдоғанниң зияпитигә уйғур аммивий тәшкилатлириниң мәсуллириму қатнашти

Мухбиримиз әркин тарим
2014.12.26
hidayetullah-oghuzxan-maarip-teshkilati-305.jpg Шәрқий түркистан маарип вә һәмкарлиқ җәмийитиниң 2013-йиллиқ хизмәт музакирә йиғинида һидайәтуллаһ оғузхан сөз қилди. 2013-Йили 20-январ, түркийә.
RFA/Arslan


Түркийә дөләт рәиси рәҗәп таййип әрдоған 12 - айниң 25 - күни ахшам бәргән катта зияпәткә шәрқий түркистан аммивий тәшкилатлириниң рәһбәрлириму алаһидә тәклип бойичә қатнашти. Әрдоған түркийә хәлқ ирадиси мунбириниму өз ичигә алған 173 чоң аммивий тәшкилатниң мәсуллириға йеңи селинған ордисиниң зияпәт залида зияпәт бәрди. Мәзкур зияпәткә шәрқий түркистан маарип вә һәмкарлиқ тәшкилати башлиқи һидайәтуллаһ оғузхан әпәнди билән сутуқ буғрахан илим вә мәдәнийәт фонди җәмийити башлиқи алимҗан боғда әпәнди алаһидә тәклип бойичә қатнашти. Мухбирларға йепиқ өткүзүлгән бу зияпәткә түркийә сияситигә зор тәсир көрситиватқан әң чоң аммивий тәшкилатларниң мәсуллири, дөләтниң алий рәһбәрлиридин болуп, 250 әтрапида киши қатнашти.

Шәрқий түркистан маарип вә һәмкарлиқ тәшкилати башлиқи һидайәтуллаһ оғузхан әпәндиниң ейтишичә, у, зияпәт җәрянида түркийә дөләт рәиси рәҗәп таййип әрдоған билән көрүшүп, дөләт рәиси әрдоғанниң уйғурларниң түркийә пуқралиқиға қобул қилиниши вә уйғурларға иқамәт берилиши вә уйғур дәвасиға көңүл бөлүшигә рәһмәт ейтқан шундақла шәрқий җәнуби ася дөләтлиридин түркийәгә кәлгән мусапир уйғурларға түркийә дөлитиниң ярдәм қилишини тәләп қилған. Түркийәдә қейин шәрт - шараитта яшаватқан уйғурларға, шундақла тайландта туруватқан 300 уйғурни түркийәгә елип келишкә ярдәм қилишини тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.