Istanbul yashlar yermenkiside Uyghur medeniyiti tonushturuldi

Istanbul sheherlik hökümetning uyushturushi bilen bu yil tunji qétimliq yashlar yermenkisi 14 - maydin 19 - mayghiche istanbul yéngikapi sahil meydanida ötküzüldi. 6 Kün dawam qilghan bu pa'aliyet jeryanida yashlar medeniyet - sen'et, her xil köngül échish pa'aliyetler élip bérip birge yerge jem boldi.

Istanbul yashlar körgezmiside 300 ge yéqin ammiwi teshkilatlar, neshriyat organliri, zhurnallar, uniwérsitétlar, metbu'atlar, oqughuchilar uyushmiliri, idare jem'iyet, tenterbiye kulubliri qatniship körgezme achti.

Yéngikapi sahildiki pa'aliyet meydanida échilghan körgezme jeryanida 120 türlük her xil oyun pa'aliyetler körsitildi. Yazghuchi - sha'irlar - edibler, tarixchilar we dini alimlardin 60 kishi qétim yighinda söz qildi we 20 qétim sen'et pa'aliyiti ötküzüldi.

Bu yermenkide sherqiy türkistan ma'arip we hemkarliq jem'iyiti orun élip Uyghurlarning medeniyitini tonushturup pa'aliyet körsetti.

Yighinning échilish murasimida söz qilghan türkiye mu'awin bash ministiri noman qurtulmush, dunyadiki diktator hakimiyetlerge xitab qilip mundaq dédi: “Eger hakimiyet yürgüzüwatqan rayonlardiki insanlargha zulum qilish bilen yer asti we yer üsti bayliqlirini sümürüsh meqsette bir tüzüm quridighan bolsanglar dunyada tinchliq tüzümining qurulushi mumkin bolmaydu. Emma insanlarning renggi, dini, tili we medeniyitige qarimastin hezriti insan dep qaraydighan bolsaq we insanlarning yaritilishida er - ayal bir jüp we yaki dinda qérindash dep qarilidighan bolsa andin dunyada tinchliq tüzümi ornitilidu.”

Numan qurtulmush sözide yene dunyaning her qaysi jaylirida urush, ishghaliyet we bésimning eng köp qurbani boluwatqan insanlarning yashlar ikenlikini, emma yashlarning kelgüsi hayatqa ümid bilen qaririshi kéreklikini tekitlidi.

Yermenkide Uyghurlarning milliy medeniyetlirini tonushturidighan, erenche - ayalche badam we chimen doppilar, kanwa könglekler, sherqiy türkistan xeritisi chüshürülgen könglek we shepkiler, Uyghurlarning her xil chalghu eswabliri, qol hünerwenchilikke alaqidar her xil réshiliye - keshtiler, xurjun, qamcha, dap, cheynek qatarliq buyumlar körgezmige qoyulup sétishqa chiqirildi.

Yermenkige sherqiy türkistan bayriqi ésilghandin bashqa, mehmut qeshqiri, yüsüp hajip, elishir nawayi qatarliq Uyghur alimlarning resimliri chüshürülgen chong hejimlik resimler qoyuldi. Uyghurlarning omumiy ehwali tonushturulghan 6 betlik teshwiqat waraqchidin 1000 parche tarqitilghanliqi bildürüldi.

Yermenkide yene “Ottura asiya méhman dastixini” dégen réstoran Uyghur we özbék tamaqlirini teyyarlap sétishqa chiqirip Uyghur tamaqlirini tonushturush pa'aliyiti élip bardi. Uyghur - özbék tamaqliri dégen xetler yézilghan wiwiska kishilerning diqqitini tartti. U yerde biz kishilerning Uyghur tamaqliridin polu, manta we samsilarni yaqturup yewatqanliqini uchrattuq.

Biz bu pa'aliyet toghrisida pikir qarashlirini élish üchün yermenkide körgezme achqan sherqiy türkistan ma'arip we hemkarliq jem'iyitining ayallar bölümi bashliqi munewwer özUyghur xanim we ottura asiya méhman dastixini réstoranning xojayini ilhamjan bilen söhbet élip barduq.