Гуәнтанамодики уйғур тутқунларға беғишланған йеңи һөҗҗәтлик филим қандақ вуҗутқа чиқти?

Мухбиримиз қутлан
2014-10-17
Share
guantanamo-uyghur-rushan-abbas.jpg Мәзкур һөҗҗәтлик филимға қатнашқан рошән аббас ханим филимниң режиссори патришйо һенрикуәз билән. 2014-Йил өктәбир, канада, монтреал.
RFA/Qutlan

Уйғур мәсилиси пүтүн дунядики таратқуларниң диққәт мәркизидә туруватқан бир пәйттә, гуәнтанамодики уйғур тутқунларниң һаятиға беғишланған йеңи һөҗҗәтлик филим йоруқлуққа чиққан.

Канада вәтәндашлиқидики патришйо һенрикуез режиссорлуқ қилған 90 минутлуқ һөҗҗәтлик филим "гуәнтанамодики уйғурлар: бимәнилик тутқунлири" монтреал хәлқара филим фестивалида қоюлғандин кейин зор тәсир пәйда қилған.

Мәзкур филимниң мувәппәқийәтлик ишлинишидә күч чиқарған һәмдә өзи биваситә филимгә қатнашқан рошән аббас ханим бу һәқтә зияритимизни қобул қилди.

У мәзкур филимниң һазирға қәдәр гуәнтанамодики уйғур тутқунлар һәққидә ишләнгән һөҗҗәтлик филимлар ичидә әң мувәппәқийәтлик әсәр болғанлиқини алаһидә тәкитлиди.

Униң билдүрүшичә, филим режиссори патришйо һенрикуез әслидә чилилиқ киши болуп, у әйни вақитта чилидики диктатор реҗимдин қечип канадаға кәлгән вә сиясий панаһлиқ тилигән. Патришйо әйни вақитта қачқунлуқ һаятини өз бешидин өткүзгән киши болғачқа, гуәнтанамоға гунаһсиз қамалған 22 нәпәр уйғурниң аччиқ кәчмишлирини қәлбиниң чоңқур қатламлиридин һес қилған.

У мәзкур филимдә гуәнтанамодин албанийәгә йәрләштүрүлгән абабәкри қасим, бермудаға йәрләштүрүлгән хелил вә палавға йәрләштүрүлгән әхмәт қатарлиқ үч нәпәр уйғурниң әслимә вә баянлири арқилиқ гуәнтанамодики уйғур тутқунларниң һаятини йорутушқа тиришқан.

Филимдә йәнә, гуәнтанамодики уйғур тутқунларниң делосиға биваситә арилашқан килшиләр, шу җүмлидин уларниң адвокати вә уларға йилларчә тәрҗиманлиқ қилған рошән аббас ханимниң баянлириму муһим орун тутқан.

Мәзкур һөҗҗәтлик филимдә 22 нәпәр уйғур мусапирниң хата һалда тутулушидин башлап гуәнтанамо түрмисигә қамилиши вә узаққа созулған мурәккәп тартишмилардин кейин 3 - дөләткә йәрләштүрүлишигичә болған пүткүл җәрянни сиясий "бимәнилик" темиси астида йорутуп беришкә тиришқан.

Филим монтреал хәлқара филим фестивалида тунҗи мәйдан қоюлғандин кейин йоқири баһаға еришип, кәлгүси аместердамда өткүзилидиған филим мукапатиға намзатлиққа көрситилгән.

Рошән аббас ханим мәзкур һөҗҗәтлик филимниң һазирқи вәзийәттә йоруқлуққа чиқиши хәлқара җәмийәтниң уйғур мәсилисини йәниму чоңқурлиған һалда чүшинишидә шундақла уйғурларниң хитайниң төмүр пәрдиси арқисиға йошурунған реаллиқини билишидә муһим әһмийәткә игә икәнликини илгири сүрди.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт