Истанбулдики қанлиқ һуҗумда һаятидин айрилған абдулһәким буғда йәрликигә қоюлди

Ихтиярий мухбиримиз арслан
2016-07-02
Share
abdulhekim-bughda-turkiye-istanbul-partlash-jinaza.jpg Истанбул ататүрк айродромидики террор һуҗумида һаятидин айрилған түркийә пуқраси уйғур абдулһәким буғданиң җиназа намизи
RFA/Arslan

Истанбул ататүрк айродромидики қанлиқ террор һуҗумида үч йеригә оқ тегип һаятидин айрилған түркийә пуқраси уйғур абдулһәким буғданиң җиназа намизи 30 - июн пәйшәнбә күни әсир намизидин кейин зәйтинбурну аминә инанч җамиси алдида оқулди. Униң җиназисиға түрк байриқи йепилди.

Зәйтинбурну шәһәр башлиқи мурат айдин, түрк һава йоллири мудири тәмәл котил, түрк һава йоллири идариси башлиқи илкәр айҗи, абдулһәким буғданиң акилири әсқәр буғда, әхмәт буғда, иқбал буғда вә уруқ - туғқанлири, истанбулдики уйғур тәшкилатларниң мәсуллири вә әзалири, шундақла зәйтинбурну вә әтраптики районлардин кәлгән уйғур, қазақ, түрк қатарлиқ һәр милләт кишилиридин болуп, нәччә миң киши абдулһәким буғданиң мейит намизиға иштирак қилди.

Биз, абдулһәким буғда вә бу һуҗумда һаятидин айрилған барлиқ мусулманларға аллаһтин рәһмәт тиләймиз. Униң аилисигә шундақла мусибәткә учриған барлиқ аилиләргә сәбрә тиләймиз.

Биз абдулһәким буғда тоғрисида униң қошниси һамут көктүрк әпәнди вә мәрһумни яхши тонуйдиған шәрқий түркистан вәхпи идарә һәйәт мәсуллиридин тибәт йүҗәктүрк әпәнди билән сөһбәт елип бардуқ.

Тибәт йүҗәтүрк әпәндиниң билдүрүшичә, абдулһәким буғданиң ата - аниси уйғур дияридин түркийәгә көчүп олтурақлашқан муһаҗир аилә болуп, униң төт акиси бар икән. Мәрһум абдулһәким 1991 - йили истанбулда туғулған, у толуқ оттура мәктәпни пүттүргәндин кейин әскәрликкә қатнишип һәрбий вәзиписини өтигән кейин истанбул ататүрк айродромиға ишқа орунлишип хизмәт қилғили 2 ай болған икән.

Истанбул ататүрк айродромидики қанлиқ террор һуҗуми елип барғучилар
Истанбул ататүрк айродромидики қанлиқ террор һуҗуми елип барғучилар

Террорлуқ һуҗумчиларниң кимликлири ениқланди

Истанбул айродромида мәйданға кәлгән бомба билән өзини қошуп партлитиш һуҗум қилип 44 кишиниң җениға замин болған 239 кишини яриландурған үч террорчидин иккисиниң исим кимликлири ениқланди.

Бу һуҗумни кәлтүрүп чиқарған террорчилардин бирсиниң исми вадим османуф, йәнә бириниң болса раким булгаруф икәнлики, русийә паспорти билән истанбулниң фатиһ районида бир өйниң бир йиллиқини иҗаригә елип олтурғанлиқи билдүрүлди. Өй иҗаригә елиш үчүн өй - мүлүк ширкитигә бәргән паспорт копийәсидин бу қанлиқ һуҗумни кәлтүрүп чиқарған кишиләр икәнлики ениқланди.

Иҗаригә алған өйгә йеқин әтраптики бихәтәрлик көзитиш аппаратини тәкшүрүш елип барған сақчилар бу һуҗумчиларниң шу күни кәч саәт 8:35 тә өйдин чиққанлиқини вә өйгә йеқин әтраптики әхләт сандуқиға бир нәрсини атқанлиқини байқиди. Сақчиларниң тәкшүрүш нәтиҗисидә террорчилар һуҗум нишанини пиланлиған компютерни мих қеқиш арқилиқ қаттиқ дискисини бузуветип, әхләт сандуқиға ташливәткән. Сақчилар компютердики учурларни әслигә кәлтүрүшкә тиришмақта икән.

Һаятидин айрилғанларниң сани 44 кә йәтти

Бу вәқәдә яриланғанлардин 25 яшлиқ ясин өҗал җиддий қутқузуш бөлүмидә һаятидин айрилған болуп, буниң билән бу қанлиқ вәқәдә өлгәнләрниң сани 44 кә чиқти.

Истанбулда 16 киши тутқун қилинди

Сақчилар истанбул ататүрк айродромидики қанлиқ террор һуҗумиға алақидар истанбулниң 16 җайидики адресқа охшаш вақитта бастуруп кирип тәкшүрүш елип барди. Нәтиҗидә 3 чәтәлликни өз ичигә алған 16 киши тутқун қилинди. Һазир истанбул сақчи идарисидә тутуп турулуватқан бу кишиләр үстидин тәптиш қилинмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт