Istanbulda muxbirlarni kütiwélish yighini ötküzüldi

2-Ayning 3-küni merkizi istanbulgha jaylashqan xelq'ara musapirlar hoquqi jem'iyitining uyushturushi bilen axbarat élan qilish yighini ötküzülüp türkyidiki, özbék, Uyghur, chéchen musapirlirining kishilik hoquqlirining depsendichilikke uchrighanliqi otturigha qoyuldi we türkiyining ularni kelgen yurtlirigha qayturmasliqi chaqiriq qilindi.

Xelq'ara musapirlar hoquqi jem'iyitining re'isi ughur yildirim: “Istanbul ortaköydiki térrorluq hujumi jinayetchisining tutulushi jeryanida, chéchen we Uyghur musapirliri kishilik hoquq depsendichiliklirige uchridi, jem'iyitimizge bu heqte kéliwatqan erz-shikayetler her küni éshiwatidu” dédi.

Anadolu agéntliqining xewirige asaslan'ghanda, xelq'ara musapirlar hoquqi jem'iyitining re'isi ughur yildirim jem'iyetning fatih rayonidiki merkizide axbarat élan qilish yighini ötküzüp, türkiyege panahlinish meqsitide kelgen chéchen we Uyghurlarning jem'iyetke qiliwatqan erz-shikayetlirining éshiwatqanliqini bildürgen. U jem'iyetke eza xalisane adwokatlarning saqchixanilarda tutup turuluwatqan özbék, chéchen we Uyghur musapirlarning ehwalini tekshürgenliklirini eskertip: “Muhim bolghini, yurtlirigha qayturuwétish toxtitilishi kérek. Bir kishining xata halda qayturuwétilishi, biz üchün éytqanda, pütün insaniyetning ölümi bilen oxshash. Qayturuwétish-ornini toldurghili bolmaydighan xata yol hésablinidu. Türkiyede panahlan'ghan bu bichare kishilerning peryadlirigha qulaq sélinglar” dégen.

Bir qanche kündin béri, istanbulning zeytinburnu rayonidiki bir ashxanida qolgha élin'ghan ikki Uyghur atatürk ayrodrmida qayturuwétilish peytide, Uyghur jem'iyetlirining arilishishi netijiside qayturulushtin saqlinip qalghan idi.

Yéqinda türkiyining her qaysi sheher, rayonliri 52 ming saqchining qatnishishi bilen türkiye huzur herikiti namida yollargha tosaq qurup, kimlik tekshürüsh, aptomobil tekshürüsh élip barmaqta. Bu munasiwet bilen, saqchilarning ötken charshenbe küni zeytinburnuda tekshürüsh élip bérip ondin artuq Uyghurni tutqun qilghanliqi bildürüldi.

Hazir zeytinburnu saqchi idarisida 8 Uyghurning tutup turuliwatqanliqi bildürülgen bolsimu, ularning néme sewebtin tutulghanliqi bildürülmidi.

Hör sherqiy türkistan munbiri mesilihet kéngesh yighini échildi

2-Ayning 1-küni charshenbe küni istanbulda hör sherqiy türkistan munbiri namida meslihet kéngesh yighini ötküzüldi. Yighin'gha dunya Uyghur qurultéyining mu'awin re'isi séyit tumtürk, sherqiy türksitan ma'arip we hemkarliq jem'iyitining re'isi hidayetullah oghuzxan, sherqiy türkistan wexpining wekili tibet yüje türk, sherqiy türkistan yashlar we hemkarliq jem'iyiti re'isi ilhan turanli, yawro'asiya wexpidin abdujélil turan qatarliq 8 teshkilatning rehberliri qatnashti.

4 Sa'et dawam qilghan yighinda türkiyidiki Uyghurlarning düch kéliwatqan mesililiri otturigha qoyuldi we tutuliwatqan Uyghurlarning xitaygha qayturulmasliqi üchün chare tépish toghrisida muzakire élip bérildi.

Biz bu yighin toghrisida we türkiyidiki Uyghurlarning yéqindin buyan düch kéliwatqan qiyinchiliq mesililiri toghrisida dunya Uyghur qurultéyining mu'awin re'isi séyit tumtürk we sherqiy türkistan ma'arip we hemkarliq jem'iyitining re'isi hidayetullah oghuzxan bilen söhbet élip barduq.