Türkiye rehberliri istanbulda yüz bergen térrorluq hujumini qattiq eyiblidi

12-Yanwar küni etigen türkiye waqti on yérim etrapida istanbulning tarixiy sayahet merkezliridin biri bolghan sultan'ehmet meydanida yüz bergen partlitish weqeside 11 kishi öldi, 15 kishi yaridar boldi.

Türkiye bash ministiri ehmet dawut'oghluning axbaratqa bergen bayanatigha asaslan'ghanda, qaza tapqanlarning köpi gérmaniye puqrasi iken.

Türkiye re'is jumhuri rejep tayyip erdoghan bomba partlatqan térrorchining süriyelik ikenlikini bildürüp mundaq dédi: “Istanbulda sultan'ehmet meydanida yüz bergen, süriyelik bir térrorchining özini öltürüwélish xaraktérlik bomba partlitish weqesi dep qariliwatqan térrorluq hujumni nepret bilen eyibleydighanliqimni ipadilimekchimen. Mezkur weqede ölgenlerning sani 10 etrapida bolup, 15 etrapida yaridar bar, bular chet'ellik we yerlik kishilerdin ibaret. Men bu kishilerning a'ile tawabi'atlirigha sebir tileymen. Biz türkiye jumhuriyiti döliti bolush süpitimiz bilen bu térrorluq weqesige chétishliq térrorluq teshkilati we shexslerni qisqa waqit ichide éniqlap chiqimiz.”

Türkiye bash ministiri ehmet dawut'oghlu bolsa, bomba partlatqan térrorchining da'ésh térror teshkilatining ezasi ikenlikini bildürdi. U, axbarat bayanatida térrorluqni nepret bilen eyibleydighanliqini ipadilep mundaq dédi: “Biz hazirghiche p k k, da'ésh we elqa'ide térror teshkilatigha we pütün térror teshkilatlirigha qarshi izchil halda küresh qilip kéliwatimiz. Yéqinqi yillardin béri süriyediki muqimsizliq, iraqtiki qalaymiqanchiliqtin paydilan'ghan demeshq iraq islam döliti térrorchiliri dunyaning herqaysi jaylirida, dölitimizde wehshiylerche partlitish weqesi élip barmaqta. Istanbulda élip bérilghan partlitish weqeside köp sanda kishi hayatidin ayrildi. Biz bu insanliq qélipidin chiqqan hujumni yene bir qétim nepret bilen eyibleymiz. Herqaysi döletlerni térrorgha qarshi küreshte hemkarlishishqa chaqirimiz.”

Türkiyediki eng chong ammiwi teshkilatliridin biri bolghan “Podem” ning bashliqi peker ependi da'ish térrorluq teshkilatining bu partlitish weqesini élip bérishtiki meqsitining dunyagha qorqunch yéyish arqiliq meqsitige yétishtin ibaret ikenlikini bayan qilip mundaq dédi: “Bu insaniy jehettin nahayiti échinishliq, chünki insanlar ölidu. Türkiyege sayahetke kelgen bigunah ademler öldi. Bu térrorluqni sayahetchilerge qarshi élip bérishi dunyagha térrorluq qorqunchi yéyishtin ibaret bolsa kérek dep oylaymen. Térrorchilarning meqsiti pütün dunyada qorqunch peyda qilishtin ibaret. Buning türkiyede istanbulda meydan'gha kélishi türkiyening iqtisadighimu menpiy tesir körsitidu. Bu hemme jehettin échinishliq bir weqe, qattiq eyibleymiz.”

Istanbulning dangliq sayahet merkezliridin biri bolghan sultan'ehmet meydanidiki térrorluq partlitish weqesini eyiblep bayanat élan qilghan türkiyede pa'aliyet élip bériwatqan sherqiy türkistan medeniyet we hemkarliq teshkilati re'isi séyit tümtürk ependi, türkiyediki Uyghurlargha wakaliten bigunah insanlarni nishan qilghan bu térrorluq weqesini qattiq eyibleydighanliqini bayan qildi.

Dunya Uyghur qurultiyi ijra'iye komitéti mudiri dolqun eysa ependimu inkas qayturup,mezkur térrorluq weqesini eyibleydighanliqini bildürdi.

Türkiyening enqere shehiride 10-ayning 10-küni yüz bergen qanliq partlitish weqeside 112 kishi qaza tapqan idi.