Истанбулдики партлашта бир уйғурни өз ичигә алған 41 киши һаятидин айрилди

Ихтиярий мухбиримиз арслан
2016.06.29
istanbulda-partlash-abdulhekim-bughda.jpg

Истанбул ататүрк хәлқаралиқ айродромида йүз бәргән террорлуқ һуҗумида һаятидин айрилған 41 кишиниң ичидә абдулһәким буғда исимлик уйғурму барлиқи тоғрилиқ хәвәрдин сүрәткә елинған. 2016-Йили 29-июн. RFA/Arslan

istanbulda-partlash-abdulhekim-bughda-2.jpg

Истанбул ататүрк хәлқаралиқ айродромида йүз бәргән террорлуқ һуҗумида һаятидин айрилған 41 кишиниң ичидә абдулһәким буғда исимлик уйғурму барлиқи тоғрилиқ хәвәрдин сүрәткә елинған. 2016-Йили 29-июн. RFA/Arslan

istanbulda-partlash-abdulhekim-bughda-1.jpg

Истанбул ататүрк хәлқаралиқ айродромида йүз бәргән террорлуқ һуҗумида һаятидин айрилған 41 кишиниң ичидә абдулһәким буғда исимлик уйғурму барлиқи тоғрилиқ хәвәрдин сүрәткә елинған. 2016-Йили 29-июн. RFA/Arslan

istanbulda-partlash-3-qetim-adem-bomba.jpg

Истанбул ататүрк хәлқаралиқ айродромида террорлуқ һуҗуми йүз бәргән райондин көрүнүш. 2016-Йили 29-июн. RFA/Arslan

Истанбулдики ататүрк хәлқаралиқ айродромда террорлуқ һуҗуми йүз берип 41 киши һаятидин айрилди, 239 киши яриланди. Һаятидин айрилғанлар арисида айродромда ишләйдиған абдулһәким буғда исимлик уйғурму һаятидин айрилди. Бу қанлиқ вәқә 28-июн сәйшәнбә күни истанбул вақти кәч саәт 21:22 дә мәйданға кәлди.

Истанбул валийлиқи: 41 киши һаятидин айрилди, 239 киши яриланди

Истанбул валийлиқидин елан қилинған баянатта мундақ дейилгән: “28-июн сәйшәнбә күни ататүрк айродромида мәйданға кәлгән зораван террорлуқ һуҗум нәтиҗисидә 41 кишиниң һаятидин айрилғанлиқи ениқланди. Һаятидин айрилғанлардин 37 кишиниң кимлик салаһийити ениқланди. Булардин 10 киши чәтәллик, 3 киши қош вәтәндаш икәнлики ениқланди. Вапат болғанлардин 19 кишиниң җәсити аилилиригә тапшурулди. Вәқәдә ярилинип дохтурханида ятқан 239 кишидин 109 киши сақийип дохтурханидин чиқип болди. 130 Кишини давалаш давам қилмақта. Зораван террорлуқ һуҗуми вә җинайәтчиләр һәққидә кәң түрдә инчикиләп тәкшүрүш елип берилмақта. Бу хаинларчә елип берилған террорлуқ һуҗумда һаятидин айрилғанларға аллаһтин рәһмәт тиләймиз, аилә йеқинлириға сәбир, яриланғанларға шипалиқ тиләймиз.”

Террорлуқ һуҗум үстидә тәкшүрүш давам қиливатиду

Истанбулдики бәкиркөй сот мәһкимисиниң баш тәптиши тәрипидин террорлуқ һуҗумиға алақидар тәкшүрүш давам қиливатиду. 3 Террорчиниң җәсити пүтүнләй парчилинип кәткән болуп, кимлик салаһийитини ениқлаш үчүн хизмәт ишлиниватқанлиқи, чәтәллик икәнлики тоғрисида мәлумат берилди. Буниң билән биргә сақчи даирилири айродромниң бихәтәрлик көзитиш аппаратлириниң хатирилирини тәкшүрмәктә икән.

Террорчиларни айродромға елип кәлгән таксичи сорақтин кейин қоюп берилгән.

Баш министир вәқә йүз бәргән орунда тәкшүрүш елип барди

Түркийә баш министири бинәли йилдирим, муавин баш министир номан қуртулмуш, ички ишлар министири әфкан ала, қатнаш министири әхмәт арслан, аилә вә иҗтимаий сиясәтләр министири фатимә саян ханим қатарлиқ министирларниң һәмраһлиқида әнқәрәдин истанбулға кәлди вә вәқә йүз бәргән орунни көздин кәчүрди.

Бу террорлуқ һуҗумдин кейин түркийә баш министири бинәли йилдирим истанбул айродромиға келип вәқә йүз бәргән орунни көздин кәчүрди вә бакиркөй дохтурханисидики яридарларни зиярәт қилди. Мухбирларға вәқә һәққидә мәлумат бәрди.

Баш министир бинәли йилдирим, истанбул ататүрк айродромида саәт 21:22 дә йүз бәргән партлаш һуҗум нәтиҗисидә дәсләпки мәлуматларға қариған 36 кишиниң һаятидин айрилғанлиқини вә көп санда кишиниң яриланғанлиқини билдүрди.

Баш министир бинәли йилдирим, бу һуҗумниң бигунаһ кишиләрни һуҗум нишани қилған пәскәш бир террорлуқ һуҗум икәнликини ипадилиди вә мундақ деди: “террорлуқ хәлқаралиқ бир тәһдит икәнлики бу вәқә билән йәнә бир қетим опочуқ оттуриға чиқти. Мәқсити, нишани немә болуштин қәтийнәзәр қайси тәрәптин болса болсун дөлитимиз бу пәскәш һуҗумға баш әгмәйдиған мустәһкәм ирадигә вә күчкә игә.”

Баш министир бинәли йилдирим террорчилар һәққидә тохтилип мундақ деди: “террорчилар бир тиҗарәт такси билән айродромға кәлгән вә һуҗум пиланини ишқа ашурған, террорчилар алди билән қоралидин қара-қоюқ оқ атқан, кейин өзини қошуп партлатқан 3 адәм бомбиниң һәммиси өлди.”

Бинәли йилдирим бу террорлуқ һуҗумниң арқисида даиш (ирақ шам ислам дөлити) тәшкилатиниң пәйда қилған болуш еһтимали барлиқини билдүрди.

Вәқә йүз берип 5 саәттин кейин айропилан қатнаш учушлири қайтидин әслигә кәлди.

Түркийә дөләт миқясида бир күнлүк матәм елан қилинип, байрақ йерим чүшүрүлди.

Абдулһәким буғда исимлик уйғур вәқәдә вапат болди

Истанбул ататүрк хәлқара айродромида йүз бәргән террорлуқ һуҗумида абдулһәким буғда исимлик бир уйғур яшму һаятидин айрилди.

Түркийә мәтбуатлири вә телевизийә қаналлирида абдулһәким буғда вә униң шәрқий түркистанлиқ икәнликини тәкитләп хәвәрләр тарқитилди.

Мәрһум абдулһәким буғданиң йеқин туғқанлиридин муһәммәт тохтиниң билдүрүшичә, мәрһум истанбул зәйтинбурнуда аниси билән олтуридикән. Әскәрликкә қатнишип қайтип кәлгинигә төт ай болған. Түркийәниң қанунлириға асасән яшлар 20 яшқа тошқанда әскәрликкә қатнишип һәрбий мәҗбурийәт өтәйду, у әскәрликкә бериштин бурун “чәләби” исимлик бир тез йәткүзүш ширкитидә хизмәт қилидиған болуп, ширкәтниң ататүрк айродромидики йүк селиш орнида ишлигән.

Шәрқий түркистан вәхпиниң идарә һәйәт мәсуллиридин тибәт йүҗәтүркниң билдүрүшичә, абдулһәким буғда айродромдики террорлуқ һуҗумида үч йеригә оқ тегип еғир яриланған вә дохтурханида һаятидин айрилған. Униң җәсити һазир әдлийәлик тәкшүрүштин өткүзүлмәктә.

Мәрһум абдулһәким буғданиң дадиси бурунла вапат болған болуп, униң вақитсиз қаза тепиши аниси вә уруқ-туғқанлирини еғир мусибәткә салмақта. Истанбулдики уйғурлар мәрһумниң өйигә келип аилисигә тәзийә билдүрүшмәктә.

Биз, абдулһәким буғда вә бу һуҗумда һаятидин айрилған барлиқ мусулманларға аллаһтин рәһмәт тиләймиз. Униң аилисигә шундақла мусибәткә учриған барлиқ аилиләргә сәбир тиләймиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.