Истанбулдики рейна қәтлиамини садир қилғучи қатил тоғрисида тәпсилий мәлуматлар ашкариланди

Ихтиярий мухбиримиз арслан
2017.01.18
Share on WhatsApp
Share on WhatsApp
istanbul-terror-hujum-tutulghan-suret.jpg Террорчи абдуқадир машарипофниң тутулған вақтидики сүрити. 2017-Йили 17-январ.
RFA/Arslan

Йеңи йил кечиси истанбулда бир кечилик кулубқа қораллиқ һуҗум қилип 39 кишини өлтүрүп қечип кәткән вә 17 күндин кейин истанбулниң әсәнюрттики бир аилә қорусида тутулған өзбекистанлиқ қатил абдуқадир машарипофниң қатиллиқ қилиш буйруқини сүрийәниң раққадики каттивешидин алғанлиқи оттуриға чиқти.

Сақчилар өйгә бастуруп киргәндә абдуқадир машарипоф ятақниң астиға йошурунғанлиқи билдүрүлди. Сақчиларни көргән һаман мени өлтүрмәңлар дәп варқириғанлиқи илгири сүрүлди. Қатилниң сақчиларға бәргән ипадисидә һуҗумни қандақ елип барғанлиқи, қандақ көзитиш елип барғанлиқи, һуҗум қилиш җәрянида вә кейинки вақитларда немиләрни қилғанлиқи қатарлиқларни айрим-айрим тәпсилий аңлатқан.

Хәвәрләрдә қатил қачқандин кейин 4 яшлиқ оғлини биргә елип қачқанлиқи билдүрүлгән иди. Әмма тутулған вақитта оғли йенида йоқ иди. Мутәхәссисләр қатилниң оғлини даишниң башқа бир мәхпий өйигә әвәткәнликини тәхмин қилмақта. Қатил абдуқадир машарипофниң аяли вә қизи өткән һәптә пәндиктә бир өйдин тутқун қилинған иди.

Қатилниң әсли нишани таксим мәйданини қанға бояш иди

Оттурашәрқ гезитиниң бүгүнки санида билдүрүшичә, қатил абдуқадир машарипофниң сақчиларға иқрар қилған бир қисим мәлуматлар оттуриға чиқти. Қатил машарипоф йеңи йил кечиси таксимда қанлиқ вәқә садир қилиш үчүн раққадики даиш террорлуқ тәшкилатниң каттивешидин буйруқ алғанлиқини билдүргән. Қатил абдуқадир машарипоф “такисмға бардим, әмма сақчилар бихәтәрлик тәдбирлирини толуқ алған икән. Маңа буйруқ бәргән киши билән йеңидин алақә қилдим. Районда йеңи бир һуҗум нишани издишимни тәләп қилди. Деңиз бойида такси билән айландим, рейна кечилик кулуби мувапиқ көрүлди. Раққадики кишидин соридим, мувапиқ көрди” деди.

Истанбулдин қечиш үчүн тәйярлиқ қилмақта икән

Әсәнюрттики өйниң даиш террорлуқ тәшкилатиниң кишиләрни йөткәш үчүн вақитлиқ орунлаштуридиған орун қилип қолланғанлиқи оттуриға чиқти. Қатил машарипофниң истанбулдин кетишни пиланлиғанлиқи, бир кишидин ярдәм тәләп қилғанлиқи билдүрүлди.

Қатил машарипофниң сақчиға бәргән иқрарнамисиниң бир қисми йеңи шафақ гезитидә бүгүн елан қилинди. Иқрарнамә һәққидә мундақ дейилгән: “2016-йили 1-айда түркийәгә кәлгәндә коняға орунлаштурулған, у йәрдә 1 йилға йеқин қалған, бу җәрянда раққадики каттивеши билән давамлиқ мунасивәт қуруп учур алмаштурған. Йеңи йил кечиси таксимда адәм бомба болуп һәрикәт қилиш үчүн буйруқ берилгән. Шуниң билән истанбулға кәлгән, таксимда видиоға алған син көрүнүшини раққиға әвәткән, раққадики хоҗаака ләқими бар киши вә ярдәмчиси мувапиқ көргән. Таксимда сақчилар бихәтәрлик тәдбирлирини күчәйткән болуп бу йәрниң уйғун әмәсликини һес қилған вә ортакөйдики рейна кечилик кулубниң бихәтәрлик сақчилири йоқлуқини көрүп у йәргә һуҗум қилишни пиланлиған вә қәтлиам қилған.”

Қатилниң сақчиларға бәргән мәлуматиға қариғанда, вәқәдин кейин қатил раққа билән алақә қилған вә бир мәзгил йошурунуп җим турушни конядики даиш әзасиниң униң билән алақә қилидиғанлиқини билдүргән. Кейин әсәнюрттики өйгә елип барған әли муһәммәд җәмил исимлик ирақлиқ билән мунасивәт қурған вә әсәнюртта униң иҗаригә алған өйигә кәлгән, у җәрянда 4-5 өй алмаштурған, җәмил исимлик киши сақчиларниң кәң түрдә издәватқанлиқини билип әң ахирида йеңи иҗаригә алған әсәнюрттки тутулған өйгә йөткигән.

Қатил машарипоф истанбул сақчи идарисидә тутуп турулуватқан болуп, истанбул сақчи идариси террорлуққа қарши туруш бөлүми билән истихбарат алаһидә анализ бөлүми уни сорақ қилған. Сорақ қилиш җәрянида қатилниң һәр бир сөзиниң раст-ялғанлиқи бир-бирләп тәкшүрүп тәтқиқ қилинған.

Қатил башта түркчә сорақ қилинған, қатил түркчини аз билидиғанлиқини билдүргәндин кейин, инглизчә соралған, униңғиму җаваб берәлмигәндин кейин, русчә сорақ сориған, қатил машарипоф русчә сораққа тиз-тиз җаваб бәргән, соал-сорақ түнүгүн кечидин буян давам қиливатқанлиқи билдүрүлди.

Биз бу һәқтә пикир-қарашлирини елиш үчүн истанбулдики шәрқий түркистан маарип вә һәмкарлиқ җәмийитиниң рәиси һидайәтулла оғузхан билән сөһбәт елип бардуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.