Okinawaliq momay: Uyghurlarni biz choqum qollaymiz

6 - Ayning 29 - küni Uyghur milliy herikitining rehbiri rabiye qadir xanim okinawa ölkisining naha shehiridiki aptonomiye sariyida üch yüzge yéqin kishige Uyghur mesilisi toghrisida doklat berdi. Doklatqa asasliqi naha shehiridiki xanim - qizlar qatnashti.

Rabiye qadir xanimning doklatida Uyghur qizlirining ichki ölkilerdiki paji'elik hayat kechürmishliri bayan qilindi.

Ziyaritimizni qobul qilghan rabiye qadir xanim bügünki doklati hem yaponiye tesirati heqqide toxtilip ötti.

Bügünki doklat bérish pa'aliyitige riyasetchilik qilghan zhurnalist arimoto ka'ori xanim ziyaritimizni qobul qilip rabiye qadir xanimning doklat toghrisida toxtilip mundaq dédi:

“ Bügünki doklatqa qatnashqan barliq xanimlarning qol yaghliqlirining höl bolmighini yoq, ular doklat tügigiche toxtimay yash töküp olturdi. Buningdin körüwélishqa boliduki rabiye qadir xanimning doklatining tesirining neqeder küchlük boldi. Yighin tügigende okinawaliq momaylar rabiye qadir xanimning qolini ching siqip turup: - Uyghurlarni biz choqum qollaymiz - dédi.”

Dunya Uyghur qurultiyining mu'awin re'isi ilham mexmut rabiye qadir xanimning yaponiyidiki bu qétimliq eng axirqi doklati toghrisida öz tesiratini bayan qilip ötti.

Doklat kech sa'et altidin sekkiz yérimgha qeder dawamlashti.