Ömer Uyghur, pakistan musulmanlar birliki - z partiyisining bashliqi muhemmed ijazulheq bilen körüshti

Pakistanda pa'aliyet élip bériwatqan ömer Uyghur wexpining bashliqi ömerjan tünügün islam'abadda ötküzülgen pakistanning sabiq dölet re'isi ziya'ulheq wapatining 28 yilliq xatire murasimigha qatniship, ziya'ulheqning oghli we pakistan musulmanlar birliki - z partiyisining bashliqi muhemmed ijazulheq bilen körüshti. Murasimgha pakistandiki 15 neper Uyghur bilen birlikte qatnashqan ömer Uyghur, ijazulheqqe bir minnetdarliq xéti we bir telep xet bolup ikki parche mektup sundi.

Közetküchilerning qarishiche, pakistan bilen xitay arisidiki munasiwetning yéqinqi yillardin béri barghanséri qoyuqlishishi, pakistandiki Uyghur menpe'etige éghir zerbe berdi. Mana bu zerbining netijiside, 1980 - yillardin bashlap Uyghur oqughuchilar oqup kéliwatqan pakistanning herqaysi wilayetliridiki mekteplerning ishiki Uyghurlargha taqiwétildi, pakistanda eng bashta chégra sodisini bashlighan Uyghurlar bazardin siqip chiqirilip, soda xitay shirketlirining ilkige ötti, Uyghur hajilar üchün hazirlan'ghan ikki méhmansaraymu chölderidi. 2006 - Yildin bashlash shekillen'gen bu weziyetning netijiside, pakistandiki ömer Uyghur wexpi pakistandiki oxshimighan partiyeler bilen, jümlidin ilgiriki yillarda, Uyghurlargha yéqindin yardemde bolup kelgen pakistanning sabiq dölet re'isi ziya'ulheqning siyasiy iz basarliri bilen alaqilishshke yönlendi. Pakistandiki pa'aliyetchi ömer Uyghurning tünügünki pa'aliyiti ene shu yöndiki qedemlerdin biri.

Ömer Uyghur: “Islam'abadda ötküzülgen ziya'ulheq wapatining 28 yilliq xatire murasimigha qétilduq, murasimda, ijazulheq bilen körüshüp uninggha ikki parche mektep sunduq” dédi.

Ömer Uyghurning déyishiche, mezkur murasimgha 10 minggha yéqin kishi qatnashqan, ömerjan murasimgha özi bilen birlikte qatnashqan 15 Uyghurdin üch nepiri bilen birlikte, murasim sehnisige bérip, ijazulheq bilen körüshken we uninggha ikki parche mektup sun'ghan. Melum bolushiche, mektupning biride sabiq dölet re'isi ziya'ulheqning hakimiyet béshidiki waqtida Uyghurlargha qilghan yardemlirige Uyghur xelqi namidin minnetdarliq bildürülgen, ikkinchi parche xétide, Uyghurlarning béshigha nöwette kéliwatqan palaketler bayan qilinip, pakistandin Uyghur xelqighe qarita insaniy we diniy qérindashliq mes'uliyitini ada qilishni telep qilghan.

Muhemmed ijazulheq, ömer Uyghur we ikki sepdishini qizghin qarshi alghan we teleplirige jawab bérish üchün ayrim waqit ajiritidighanliqini bildürgen.

Melum bolushiche bu, ömer Uyghurning ijazulheq bilen tunji qétim körüshüshi emes, 2006 - yili hej sepiridiki Uyghurlar pakistanda tosqunluqqa uchrighanda, ömer Uyghur bir türküm haji namzatlirini élip ijazulheqning partiye ishxanisigha bérip ehwal éytqan, ijazulheq, bularni yéteklep pakistandiki se'udi elchixanisigha barghan we elchixanining Uyghur haji namzatlirigha wiza bérishi heqqide teklip - tewisiyelerde bolghan.

Ömer Uyghur bügünki ziyaritimiz dawamida, ijazulheqning dadisi ziya'ulheqning eyni chaghda Uyghurlarning pakistandiki oqush, tijaret we hej sepirige qilghan yardemlirini eslep ötti.

Ömer Uyghur sözining axirida, ziya'ulheq alemdin ötken bolsimu, uning warisliri we qollighuchilirining pakistanda köp sanda mewjutluqini, shunga pakistandiki nöwettiki Uyghurlargha paydisiz weziyetning kelgüside choqum özgirishige ishinidighanliqini bildürdi.

Hörmetlik radiyo anglighuchilar, ziya'ulheq 1978 - we 1988 - yilliri arisida textte olturghan, gumanliq bir ayroplan qazasi bilen alemdin ötken sabiq prézidént. Uning oghli ijazulheq, dadisining wapatidin kéyin siyasiy hayatqa atlan'ghan we pakistandiki ong qanat pakistan musulmanlar birliki partiysining bashliqi.