2 - Нөвәтлик дуня уйғур яшлири путбол мусабиқиси дағдуғилиқ мурасим билән рәсмий башланди

Мухбиримиз әркин тарим
2014.06.15
turkiye-uyghur-2-putbol-musabiqe.jpg 2 - Нөвәтлик дуня уйғур яшлири путбол мусабиқисидин бир көрүнүш
RFA/Erkin Tarim


2 - Нөвәтлик дуня уйғур яшлири путбол мусабиқиси дағдуғилиқ мурасим билән рәсмий башланди. Мурасимда алди билән 9 дөләттин кәлгән путболчилар өзлири кәлгән дөләтниң байриқини көтәргән һалда параттин өтти.

Мурасим түркийә җумһурийәти билән шәрқий түркистанниң миллий маршини оқуш билән башланди. Қәйсәри шәһәрлик һөкүмәтниң путбол мәйданида өткүзүлгән ечилиш мурасимиға түркийәниң һакимийәт бешидики адаләт вә тәрәққият партийәси парламент әзаси исмайил танер әпәнди, бу мусабиқиға зор ярдәм қилған қәйсәри шәһәрлик һөкүмәтниң муавин башлиқи, д у қ муавин башлиқи сейит түрмтүрк әпәнди, әсқәр җан әпәнди, 9 дөләттин кәлгән путболчилар вә түркийәниң әнқәрә, истанбул вә қәйсәри қатарлиқ шәһәрлиридин кәлгән уйғурлардин болуп көп санда киши қатнашти.

Парламент әзаси исмайил тамер әпәнди ечилиш нутиқида уйғур яшлириниң 13 - әсирләрдә уйғурлар дөләт қурған қәйсәригә келип, путбол мусабиқиси өткүзүшиниң уйғур яшлириниң өз ара чүшинши, уйғурлар арисидики достлуқниң күчийиши, уйғурларниң түркийәни тонуши үчүн интайин зор әһмийәткә игә икәнликини баян қилди. Путбол мусабиқисиниң тинчлиқниң символи икәнликини, буниң дуня тинчлиқиға төһпә қошушини тиләйдиғанлиқини баян қилди.

2 - Нөвәтлик дуня уйғур яшлири путбол мусабиқисиниң ечилиш мурасимидин бир көрүнүш
2 - Нөвәтлик дуня уйғур яшлири путбол мусабиқисиниң ечилиш мурасимидин бир көрүнүш

Арқидин бу мусабиқигә зор ярдәм қилған қәйсәри шәһәрлик һөкүмитиниң тәнтәрбийәгә мәсул муавин башлиқи али әпәнди ечилиш нутқи сөзлиди. У нутқида тәнтәрбийәниң болупму путбол мусабиқисиниң әһмийити тоғрисида тохталди.

Арқидин дуня уйғур қурултийи муавин реиси сейит түмтүрк әпәнди нутуқ сөзләп, рабийә қадир ханим намидин шундақла пүтүн уйғурлар намидин мәзкур путбол мусабиқисиниң өткүзүлүши үчүн мадди җәһәттин ярдәм қилған қәйсәри шәһриниң шәһәр башлиқи өзһасәки әпәндигә рәхмәт ейтти.

2 - Нөвәтлик уйғур яшлири пубол мусабиқиси өткүзүлүватқан мәйданда түркийә дөләт телевизйәси нәқ мәйдандин хәвәр қилип тарқатмақта.

2 - Нөвәтлик дуня уйғур яшлири путбол мусабиқиси икки гуруппа бойичә 4 күн давамлашмақчи.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.