Һиндистанда чақирилған хәлқаралиқ қәләмкәшләр йиғинида “җаза лагерлири мәсилиси” оттуриға қоюлди

Ихтиярий мухбиримиз әркин тарим
2018-09-25

Хәлқара қәләмкәшләр уйғур мәркизиниң рәиси хәмит һәмрайеф(солда) билән баш катипи әзиз әйса әпәндиләр хәлқаралиқ қәләмкәшләр йиғинида “җаза лагерлири мәсилиси” ни оттуриға қойди. 2018-Йили 25-сентәбир, һиндистан.

RFA/Erkin Tarim

9-Айниң 25-күни хәлқаралиқ қәләмкәшләр мәркизиниң омумий йиғини һиндистанниң җәнубидики пунә шәһиридә рәсмий башланған болуп, йиғинда түрмә вә җаза лагерлириға соланған уйғур зиялийлириниң мәсилисиму оттуриға қоюлған.

Хәлқара қәләмкәшләр мәркизи 1929-йили қурулған болуп, һиндистанниң пунә шәһиридә өткүзүлгән бу қетимлиқ йиғинға хәлқара қәләмкәшләр мәркизигә қарашлиқ 60 дөләттики қәләмкәшләр тәшкилатиниң көплигән әзалири қатнашти

Уйғурларға вакалитән хәлқара қәләмкәшләр уйғур мәркизиниң рәиси хәмит һәмрайеф билән баш катипи әзиз әйса қатарлиқ 2 нәпәр киши иштирак қилди. Әзиз әйса әпәнди йиғин залида туруп телефон зияритимизни қобул қилип бу һәқтә мәлумат бәрди.

Бу йил һиндистанниң қурғучи рәһбири гәндиниң туғулғанлиқиға дәл 150 йил болған болуп, бу мунасивәт билән хәлқара қәләмкәшләр мәркизиниң қурултийи һиндистанда чақирилған. Әзиз әйса әпәнди бу қетимқи йиғинниң бурунқиларға охшимайдиған тәрипи һәққидә тохталди.

Әзиз әйса әпәнди хәлқара қәләмкәшләр йиғинида америка қошма штатлири вә явропа дөләтлиридин кәлгән язғучиларниң уйғурларға болған қизиқишиниң юқири икәнликини баян қилди.

Бу қетимқи хәлқаралиқ қәләмкәшләр омумий йиғинида комитетлар бойичә музакирә елип берилған болуп, әзиз әйса әпәндиниң ейтишичә музакиридә мустәқил хитай қәләмкәшләр җәмийити, данийә вә шиветсийә қәләмкәшләр җәмийити, шундақла уйғур қәләмкәшләр җәмийәтлири уйғур дияридики “җаза лагерлирини” тақаш тәлипини оттуриға қойған.

Әзиз әйса әпәнди йиғин җәрянида нохтилиқ һалда уйғурларниң һазирқи еғир вәзийитини оттуриға қоюшқа тиришидиғанлиқини баян қилди.

Уйғур қәләмкәшләр мәркизи рәиси хәмит һәмрайеф әпәнди бүгүн тинчлиқ комитети билән қәләмкәшләрниң һәқ- һоқуқини қоғдаш комитетида уйғур язғучиларниң мәсилисиниң музакиригә қоюлғанлиқини, йиғин ахирида бу һәқтә қарар мақуллинидиғанлиқини баян қилди.

Бу қетимқи йиғин җәрянида 27-28- сентәбир күнлири ирқий кәмситишкә қарши туруш темисида йәнә бир йиғин билән мухбирларни күтүвелиш йиғини өткүзүлидиған болуп, бу йиғинлардиму уйғурларниң һазирқи һәддидин ташқири еғир вәзийити оттуриға қоюлидикән.