Qeyseridiki Uyghurlar sheher bashliqi mehmet üz hasikining qayta saylan'ghanliqini tebriklidi

Qeyseride pa'aliyet élip bériwatqan sherqiy türkistan medeniyet we hemkarliq jem'iyiti re'isi séyit tümtürk ependi we teshkilatning bashqurush hey'et ezaliridin bolup 10 kishidin terkip tapqan hey'et 22 - aprél küni qeyseri sheher bashliqi memet özhaseki ependi bilen qojasinan rayonluq hökümetning bashliqliqigha yéngi saylan'ghan ilyas yilidirimni ishxanisida ziyaret qilip tebriklidi.

30 - Mart küni türkiyede ötküzülgen sheher bashliqi saylimida mehmet özhaseki ependi qeyseri sheher bashliqliqigha qayta saylan'ghan, mustafa chelik qojasinan rayonluq hökümet bashliqliqigha saylan'ghan idi.


Uyghurlarni ishxanisida qizghin kütiwalghan qeyseri sheher bashliqi memet özhaseki ependi ulardin Uyghurlarning hazirqi weziyitini, tayland we malayshiya qatarliq jaylarda qéyin weziyette turuwatqan Uyghurlarning ehwalini soridi. Hey'et ezaliri bu heqte tepsiliy melumat berdi.

Ular Uyghur mehellisimu bashqurush da'iriside bolghan qeyseri qojasinan rayonluq hökümet bashliqi mustafa chelik ependige qeyseride Uyghurlar olturaqlashqan mehellining bezi mesililiri toghrisida melumat berdi. U, Uyghur mehellisining mesililirini hel qilip béridighanliqini dédi.

Uyghurlar her ikki bashliqqa mezkur tebrik ziyaritining xatirisi üchün kökbayraq zhurnili bilen Uyghur doppisini soghat qildi.

Qeyseride pa'aliyet élip bériwatqan sherqiy türkistan medeniyet we hemkarliq jem'iyiti re'isi séyit tümtürk ependi türkiye döliti 50 yil burun 150 Uyghur a'ilisini qeyseri sheherige jaylashturghanda Uyghur mehellisining sheher sirtida ikenlikini, 50 yildin béri qeyseri shehirining kéngiyishige egiship bu mehellining sheher otturisigha kélip qalghanliqini, yer - zéminningmu bekla qimmetliship ketkenlikini, Uyghur mehellisige igiz binalar chüshse Uyghurlar iqtisadiy jehettin kötürülsimu, Uyghurlar türkler bilen ariliship yashighan teqdirde, Uyghurlarning türkliship kétidighanliqini, Uyghurlarning öz medeniyiti we örp - adetlirini qoghdap qélish üchün bir pilan tüzüp sheher bashliqigha bergenlikini, bu heqtiki teleplirini sheher bashliqigha éytqanliqini dédi. U yene, bu heqte sheher bashliqi bilen rayon bashliqining qolidin kelgen qolayliqni yaritip béridighanliqini éytqanliqini eskertti.

Sherqiy türkistan medeniyet we hemkarliq jem'iyiti bashqurush hey'iti ezasi abdulqadir ependi qeyseri sheher bashliqining burundin tartip Uyghurlargha köngül bölüp kéliwatqan kishi ikenlikini, bundin kéyinmu yaxshi ishlarni qilidighanliqigha ishenchisi kamil ikenlikini éytti.