Хитай қирғизистанға үч милярд доллар мәбләғ салмақчи

Хитайниң дөләт рәиси ши җинпиңниң қирғизистандики зиярити давамлишиватиду. Қирғизистан президенти алмасбек атамбайиф билән хитайниң дөләт башлиқи икки дөләтниң истратегийәлик шериклик мунасивити орнитиш һәққидики тохтамнамигә қол қоюшти.

Буниңдин башқа икки тәрәп оттурисида ташйол һәм төмүр йол қурулуши,тәбиий газ линийиси қурулуши, медитсина саһәси, иқтисади һәмкарлиқ қатарлиқ йәттә келишимнамә түзүлди. Бу келишимләргә асасән хитай тәрәп қирғизистанға үч милярд доллар мәбләғ салиду. Хитай рәиси бүгүн қирғизистанниң қара балта шәһиридики хитай тәрәп мәбләғ селип қуруп бәргән, йилиға 800 йүзмиң тонна нефитни бир тәрәп қилалайдиған нефит айриш завутиниң иш башлаш мурасимиға қатнашқанда, қирғиз тәрәпниң тәлипигә асасән бу завутниң кеңәйтип қурулуши үчүн йәнә 400 милйон доллар сәрипләшкә қошулғанлиқини, шуниңдәк қирғизистанда хитай медитсина мәркизи қуруш, “йипәк йоли иқтисади һәмкарлиқ бәлбиғи” тәсәввурини әмәлгә ашуруш қатарлиқ җәһәтләрдә чүшиниш һасил қилинғанлиқини билдүрди.

Хитай дөләт рәисиниң бу қетимқи оттура асия сәпиридә енергийә байлиқлири саһәсигә алаһидә көңүл бөлүватқанлиқидики сәвәбләр һәққидә қирғизистандики пешқәдәм зиялий өмәр ибраһим өз қарашлирини билдүрди.